A ka kgona … – letšatši la 16

Morei wa dihlapi yo a se nago leina wa Mofilipino o utile parela ye kgolo, ya dikilokramo tše 34, ka tlase ga bolao bja gagwe mengwaga ye lesome. O be a dumela gore ke lešwalo la gagwe. Go bile fela ge ntlwana ya gagwe ya mapolanka e e swa lorelore gomme a bontšha bahlankankedi ba tša boeti parela, moo a ilego a hwetša gore parela yeo ke ya boleng bja dibilione tše R1,3.

Ka gobane morei wa dihlapi o be a sa lemoge boleng bja parela, o be a kgotsofetše go katana go ka iphediša mengwaga ye lesome, mola a dula ka gare ga ntlwana ye nnyane ya go hlagala. Ge fela a nagana gore o lahlegetše ke tšohle mollong, a lemoga seo a bego a na le sona.

Ke selo sa go swana le seo maphelong a rena. Ge re lahlegelwa ke tšohle, ka nnete re utolla maatla a Modimo. Gomme, go bonolo go swarega kudu ka dilo tše di se bego bohlokwa goba go amogela bophelo bja rena bjo bo hlobaetšago bjalo ka ge morei wa dihlapi a dirile, gore re lebala gore Modimo o re Lentšung la Gagwe o na le merero ya gore re atlege, le gore tše botse le kgaugelo di tla re latela mehla yohle ya go phela ga rena.

Dafida a kwešiša se. Go Pesalome 139:16-18 o ngwala gore: “O mpone le pele ke belegwa. Matšatši ohle a ka a go phela a be a šetše a ngwadilwe ka pukung ya gago, go sešo gwa tšwelela le le tee la ona. Aowii, Modimo, tše o di naganago nna di a mpalela; ga se ka bontši! Ge nka re ke a di bala, di feta dithorwana tša lešabašaba.

Letšhogo, lega go le bjalo, le dira gore re se tšee kgato – go swana le morei yo wa dihlapi. Re nagana gore go bolokegile go bea mpho, ye Modimo a re filego yona, ka tlase ga malao a rena. Re a phela go e na le go ipshina ka bophelo bjo bo feletšego. Ka lebaka la letšhogo la go ka kwešwa bohloko, ga re leke go itsenya kotsing ya lethabo. Goba mohlomongwe ka lebaka la letšhogo la go lahlwa goba leano la rena la kgwebo le tla palela, re dula mošomong goba boemong bjo re sa tlego re sa bo rata, kgalekgale.

Ke toro efe ye o nago le yona pelong ya gago ye e utilwego go swana le parela ya morei wa dihlapi? A re tšee kgato ya tumelo gomme re bolele le Modimo mabapi le go dira gore e be ya kgonthe. Kgopela bohlale, temogo, bokgoni bja go hlama le kgaugelo. Re ka, bjalo ka morei wa dihlapi, makatšwa ke boleng bja se se lego dipelong tša rena. Modimo a go šegofatše.
Mošomo wa letšatši: Botšiša Modimo ge e ba go na le se sengwe seo A se beilego go wena seo o se bego wa se hlabolla. Se ngwale fase. Gape kgopela Yena tlhahlo le bohlale ge o e ya ka tebong ya go ka se fihlelela.