A ka kgona … – letšatši la 15

[Matšatšing a mmalwa a go feta, babadi ba bantšinyana ba pakile ka boloki bja Modimo. Mo ke mabopaki a mararo ao a kago go hlohleletša.]

Mmadi wa 1, Claudia: “Nako ya go feta, yo mongwe le yo mongwe wa bašemane ba ka o ile a kganyoga diteki tša Nike. Ka gobane ke tsebile gore re ka se kgone go di reka, ka ba botša gore, ‘A re rapeleng le go tshepha Morena.’ Ke be ke tseba gore Lentšu la Gagwe le re a ka re abela. Re bala gape go Dipesalema: “Ke mo ke tlago go hlakodiša ge o mpitša mohla wa mathata, gomme wena o tla ntlhompha.”

Matšatši a mmalwa pele ya Krisemose, ke ile ka thoma go tšhoga ka gobane ke be ke tseba gore manyami e tla ba a magolo ge bana ba be ba ka se hwetše deteki. Monna wa ka le nna, le bana re ile ra kgetha go tshepha Lentšu la Modimo. Go se na yo a tsebago kgopelo ya rena go Modimo, sesi wa ka o mogolo o ile a tla a tlišetša bana ba ka dimpho tša Krisemose. E be e le eng? Diphere tše pedi tša diteki – diteki tša Nike tša go swana le tše ba di kganyogilego. Ke be nka phatloga ka lethabo. Modimo ka nnete o a amega go dintlha tša maphelo a rena gomme re ka tshepha Yena ka tšohle – tše kgolo goba tše nnyane!”

Mmadi wa 2, Trevor: “Ka mengwaga ye 14, ke ile ka thoma go kgoga. Mathomong e be e le disikarete tše mmalwa fela, eupša ge nako e tšwela pela di ile tša oketšega kudu. Ke dirile kofi letšatši le lengwe. Kgara ya ka ne e opa, gomme ka tseba gore ke ka lebaka la disikarete tše 35 tše ke di kgogilego letšatši la go feta. Nakong ya go feta, ke ile ka leka go tlogela go kgoga. Lega go le bjalo, dika tša go tlogela di ile tša dira gore ke be monna yo a befelago, wa go se thabe, wa go befela ka pela. Go amile boitseparelo bja ka gomme ka katana le go hlahla koloi gore e be ka gare ga mokgothana wa maleba.

Teko ya sikarete e ile ya atlega gomme ka tšhuba e tee. Ge ke kgogile sikarete go fihla gare ga yona, ka kwa lentšu pelong ya ka (ka dumela gore e be e le Moya wo Mokgethwa). Lentšu la mpotša gore ke tlogele go kgoga. Ka nyaka go goga la mafelelo gomme ke itime, eupša ge ke e tliša molomong, lentšu le be le le gona gape, le nkhuetša go e bea fase. Ka e bea fase, ka tswalela mahlo gomme ka rapela, ‘Morena, ke nyaka go tlogela go kgoga gomme nka se kgone go dira seo ke le tee. Ka kgopela O nthuše.’ Ka yona nako yeo, mohlolo wa direga. E be o ka re Modimo o nkgwathile.

Go fihla lehono, ga se ka ba le dika tša go tlogela. Mang le mang obolela ka fao go bilego bonolo go nna go tlogela go kgoga. Go bolela therešo, nnete ke gore e bile Modimo yo a ntokolotšego. Re swanela ke go dumela gore re ithekgile ka Yena. E sa le Ramaatlaohle.”
Mmadi wa 3, Marna: “Morwa wa buti wa ka, Hendry, o ile a tšhouka ke mohlagase. A idibala. Morwarre, Werner, a mo kitimišetša ngakeng. Ba dula metsotso e 10 go toropo. Ge ba fihla ngakeng, ba bone gore pelo ya Hendry e be e sa kibe. Ba katane le go ka dira gore pelo ya Hendry o kibe gape. Ge e kiba, dingaka di ile tša tšhoga gore a ka ba a golofetše monaganong ka ge a hlokile oksitšene nako e telele. Ba ile ba bea Hendry ka tlase ga tutuetšo ya diokobatši matšatši a 10 go thibela go ruruga ga bjoko. Morago ga matšatši a 10 ba mo tsoša. Dipoelo? Hendry ga se a ke a be le kgobalo ya bjoko gomme o raloka bjalo ka ngwana yo mongwe le yo mongwe. Ga go se se palelago Modimo!”

Modimo o nyaka go bontšha bogolo bja Gagwe go rena. A ka abela, A re lokolla le go re šireletša. Go Pesalome 145:18-19, re bala gore: “Morena o kgauswi le bohle ba ba mo llelago, ke ra ba ba mo llelago ka mmannete. O phethagatša ditumo tša ba ba mmoifago; ba ba mo llelago o a ba kwa mme a ba hlakodiša.” A re feng ditebogo lehono go Yena ka yo a lego Yena go rena. Modimo a go šegofatše.

Mošomo wa letšatši: Nagana ka katlego ye Modimo fela a go neilego yona. Leboga Yena ka yona – gomme o e botše bonyenyane motho o tee.