A ka kgona … – letšatši la 17

“Leporogo la go se ye Felo” ke le lengwe la mafelo a go tuma go baotledi ba difatanaga ge ba tsena ka Cape Town ka mmila wa N1. Go agiwa ga tsela ye e sa felago godimo ga dikokwane tše di phagamego go thomilwe nakong ya bo-1940 go nolofatša moela wa difatanaga ka bogareng bja toropo. Protšeke ya go aga e eme nakong yabo-1970 ka lebaka la tlhoko ya ditšhelete. Go tloga nakong yeo, le ile la tlogelwa le sa fetšwa.

Seripa sa ngwagakgolo morago, khansele ya toropo kua Cape Town e tšere sepheto, ka go keteka kgetho ya Cape Town go Moakanyetšo wa Motsemošate wa Lefase, sa go ka laletša maloko a setšhaba go ka romela dikgopolo tša bona tša gore go direge eng go leporogo le le sa felago. Ge ba ratile kgopolo ye e rometšwego, ba tla e diragatša.

Maphelong a rena, ka dinako tše dingwe re swanetše go dira dipheto tše bohlokwa, ka gobane sepheto se sengwe le se sengwe se tla ba le ditlamorago, letšhogo le ka tsena dipelong tša rena. Go thweng ge e ba re tla tšea tsela e fošagetšego? Ge re sa bolele le Modimo, sepheto se tla baka maphelo a rena go swana le “leporogo la go se ye felo”. Se tla re tšeela lerato la rena le go dira gore re eme le go se be le pono.

Ke dipheto dife tše o swanetšego go di dira lehono? Go nyalwa goba go tlogela tswalano? Go dula go maemo a gago a bjale lefelong la gago la mošomo goba go hwetša mošomo o moswa? Go dula goba go sepela? Goba mohlomongwe o swanetše go tšea sepheto sa gore o tla ba le bana goba aowa.

Modimo o tseba bokamoso bja gago gomme re ka boledišana le Yena go ka re fa bohlale. Go Jakobo 1:5 re bala gore: “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.” Go Jesaya 30:21 re bala gape gore: “Ge le phamoga tsela le eya ka thoko efe le efe, le tla kwa lentšu ka morago ga lena le re: “Tsela ke ye. Tšeang ka yona.” Gomme go Diema 16:9 re bala gore: “Motho a ka itherela boyo, fela ke Morena yo a mo etetšago.”

E ka ba go bonolo go tšea kgato ya tumelo le go dira sepheto? E se ka dinako ka moka. Ka lebaka la eng? Go ra gore go tswalela lebati go dikgetho tše dingwe tšeo o kago itshola ka tšona. Lega go le bjalo, Modimo a ka re fapoša go boemo bja go ema felong le tee le go re fa pono e mpsha ya maphelo a rena yeo e tlago re makatša. Le ge re ka ba re tšere tsela ye e fošagetšego, mogau wa Gagwe o gona go re hlahla go boela morago tseleng ya maleba go maphelo a rena. Ke kgato efe ya go latela ya leporogo la gago? Ga ke tsebe, eupša Modimo o a tseba. A re mo tshephe. Modimo a go šegofatše.

Mošomo wa letšatši: Ge e ba o hloka go dira dipheto tše bohlokwa gape, dula fase gomme o ngwale diputseletšwa le ditlhohlo go dikgetho ka moka. Rapela ka yona gomme o kgopele Modimo go go hlahla go ka dira dipheto tša maleba. Tshepha khutšo ye e lego ka pelong ya gago.