A ka kgona … – letšatši la 10

Nakong ya Dipapadi tša Olimpiki ka 2016, lefase le ile la makatšwa ke bokgoni bja sebapadi sa dithobollo, Simone Biles. Morago ga mengwaga ya tlwaetšo, yena le sehlopha se sengwe sa dibapadi tša dithobollo ba be ba na le sebopego se sebotse sa mmele. Mabokgoni a bona a tlogetše bana ba bantši ba thabile kudu, ka tebelelo ya go ka latela dikgatong tša bona. Morwedi wa ka, yo a bego a na le mengwaga ye meraro ka nako yeo, e be e le yo mongwe wa bana ba.

Morago ga go nkgopela dibeke, morwedi wa ka le nna re ile ra fihla thutišong ya gagwe ya pele ya dithobollo. Mme yo a bego a le kgauswi le nna, yo morwedi wa gagwe a bego a na le mengwaga ye 5 ka nako yeo le yena o be a le fao lekga la mathomo, o mpoditše gore ngwana wa gagwe o be a thabile kudu ka dibapadi tša dithobollo moo a ilego a tlogela dithuto tša gagwe tša palei. Ke ile ka bona tetelo sefahlegong sa mosetsana.

Nakong ya thutišo ye, bana ba ile ba arolwa dihlopha tše tharo tšeo di bego di swanetše go namela kota, ba phetoga moyeng gomme ba ema ka maoto, gomme ba taboga papetleng ya go taboga le go wela godimo ga mmete. Ditiragalo ka nnete di bea motheo moo ba kago aga dibapadi tša dithobollo tša nako ye e tlago.

Gare ga dithutišo, morwedi wa mengwaga ye mehlano o ile a sepela go ya go mmagwe le nna moo re bego re ba letile gona. O be a bonala a sa thaba. Ge a botšišwa gore molato ke eng, o ile a elela megokgo gomme a bolela a le gare a lla, “Aowa mma, se ga se papadi ya dithobollo. Ke nyaka go dira papadi ya dithobollo bjalo ka ge batho ba dirile thelebišeneng.” O ile a bogela Dipapadi tša Olimpiki gomme a lebeletše go diragatša bjalo ka bona nakong ya thutišo ya gagwe ya pele.

Ka dinako tše dingwe, re na le boitshwaro bjo bo swanago le bjo. Re rapela ka taba ye e itšego gomme ra letela gore Modimo a arabe ka tsela le nako tše re nago le tšona kgopolong tša rena. Ge karabo e sa swane le tetelo, ga re thabe. Re ediša megokgo gomme ra lebala gore Modimo a ka ba a le gare a bopa motheo wa rena. O nyaka gore semelo sa rena se be maatla go ka emela katlego.

Go Sakaria 4:10, re bala gore: “Ka gobane le e a nyaditšego mehla yeno ya dilo tše nyenyane o tlo thaba ge a bona leswika la sehlwa le le diatleng tša Serubabele.” Go Lukase 16:10 re bala gore: “Yo a botegago go tše dinyenyane, le go tše dikgolo o tla botega; yo a sa botegego go tše dinyenyane, le go tše dikgolo a ka se botege.”

Ke eng kgopelo ya gago ka thapelo lehono? E ka ba o rapelela kgwebo ya gago? Katološo goba kgolo kgwebong ya gago ya bjale? Mošomo wo o itšego? Ntlo ye e lego ya gago? Molekani? Ngwana? A re botegeng “go sepela godimo ga kota, re ithute go phetoga moyeng le go taboga papetleng ya go taboga” mola re gopola gore Modimo o gare o bea motheo maphelong a rena. Dipapadi tša Olimpiki di tseleng, eupša re tla yo dba karolo ya tšona ge fela re dula re botega dilong tše nnyane. Modimo a go šegofatše.

Mošomo wa letšatši: O rapelela eng lehono? Dula o botega medirong e mennyane ya go se be bohlokwa le go kgopela Modimo ka go lebanya go go thuša gore o be le kgotlelelo kgatong ya go aga motheo.