Pesalome 83

₁Modimo, o se homole;

o se re tuu, hle, Modimo,

o se ke wa dio lebelela!

₂Bona ka mo manaba a gago a tsošitšego mpherefere,

le ka mo bahloi ba gago ba go rumolago ka gona.

₃Ba dulela tšhaba sa gago serepa;

ba lakana ba ba šireleditšwego ke wena.

₄Ba re:

“A re yeng go fediša tšhaba se,

gore Baisraele ba se sa gopolwa!”

₅Ba lakane, ba kwane;

ba ipopile seboka sa go go lwantšha.

₆Ke batho ba Edomo le Baishmaele,

batho ba Moaba le Bahagare,

₇batho ba Gebale le ba Amone le ba Amaleke

le ba Filistia le badudi ba Tirose.

₈Ešita le Baasiria ba ikopantše nabo

gore ba tlaleletše ditlogolo tšeo tša Lota. Sela

₉Ba dire se o ilego wa se dira Bamidiane,

le Sisera le Jabine kua nokeng ya Kishone,

₁₀ba ba ilego ba fedišwa kua Endoro,

ya ba mmutedi wa go nontšha mobu.

₁₁Bakgomana ba bona o ba dire sa Orebe le Seebe,

baetapele ba bona ba etše Sebage le Tsalmuna,

₁₂bona ba kilego ba re:

“A re ithopeleng naga ya Modimo!”

₁₃Modimo wa ka,

ba dire sa ditlhoka ledimong,

a ba etše mooko ge o tšewa ke phefo.

₁₄Go etša mollo ge o fiša sethokgwa,

go swana le kgabo ge e tšhuma hlaga dithabeng,

₁₅le wena ba hlomare ka ledimo la gago,

o ba tšhoše ka sefefogadi sa gago.

₁₆Dira gore ba inyatše

gore ba tle ba thome go go nyakišiša,

wena Morena.

₁₇A ba segišwe batho mme ba dule ka poifo.

A ba lešwe dihlong, ba hwe.

₁₈A ba tsebe ge wena fela o bitšwago Morena,

o le Kokamababuši lefaseng lohle.