LUKASE 9

₁Jesu a bitša barutiwa ba gagwe ba lesome le ba babedi, a ba fa maatla a go leleka bademone bathong, le go ba fodiša malwetši. ₂Ke moka a ba roma go yo bega molaetša mabapi le mmušo wa Modimo le go fodiša balwetši, ₃a re go bona: “Ge le tloga le se ke la tšea selo, e ka ba lehlotlo, goba mokotlana wa mokgopedi, goba dijo, goba tšhelete, le ge e le seaparo sa bobedi. ₄Ge le fihla motseng wo mongwe mme la amogelwa ka lapeng le lengwe, le dule go lona go fihlela le tloga motseng woo. ₅Ge le ka re le fihla felo batho ba gona ba se le amogele, le tloge moo le hlohlora marole dinaong tša lena, e be go ba lemoša gore ba tla otlwa ke Modimo.”

₆Ba ile ba tloga ba sepela le metse ka moka, ba begela batho Taba ye Botse ya mmušo wa Modimo, ba bile ba fodiša balwetši mo gohle.

₇Ge Heroda, mmuši wa Galilea, a ekwa tšeo ka moka tše di bego di direga, a gakanega kudu, gobane batho ba bangwe ba be ba re go tsogile Johanese Mokolobetši bahung. ₈Ba bangwe ba be ba re ke Eliya o boile, mola ba bangwe ba re go tsogile yo mongwe wa baprofeta bale ba kgale. ₉Heroda yena a re: “Johanese ke mo kgaotše hlogo, bjale yo yena ke mang yo ke kwago ditaba tše tša gagwe?” Gomme a fela a leka go bona Jesu.

₁₀Baapostola ba boela go Jesu, ba mo anegela tšohle tše ba di dirilego. A tloga le bona fela, ba ya motseng wo o bitšwago Betsaida. ₁₁Ge batho ba ekwa gore o fao ba mo latela. Yena a ba gahlanetša, a ba botša tša mmušo wa Modimo, a fodiša ba ba tletšego go fodišwa.

₁₂Ya re ge e šetše e le mathapama, barutiwa bale ba gagwe ba lesome le ba babedi ba tla go yena ba re: “Botša batho ba ba sepele, gore ba yo inyakela dijo le marobalo mo metseng le metsaneng ya kgauswi, gobane mo ke lešokeng.”

₁₃Jesu a ba fetola a re: “Lena ba feng tša go ja.”

Bona ba re: “Ga re na selo, ge e se dinkgwa tše tlhano le dihlapi tše pedi. Kgane o ra gore re ye go rekela lešaba le lekaaka dijo?” ₁₄Gape banna ba ba bego ba le moo e be e ka ba ba dikete tše tlhano.

Jesu a botša barutiwa ba gagwe a re: “Ba dudišeng ka dihlopha tša ba e ka bago ba masome a mahlano.”

₁₅Ge ba seno ba dudiša bjalo, ₁₆Jesu a tšea dinkgwa tšela tše tlhano le dihlapi tšela tše pedi, a lebelela legodimong, a di šegofatša, a di ngwathaganya, a di neela barutiwa ba gagwe gore ba di abele batho. ₁₇Bohle ba ja ba khora. Barutiwa ba Jesu ba kgoboketša mašaledi, a tlala diroto tše lesome le tše pedi.

₁₈Ka tšatši le lengwe e rile ge Jesu a ile go rapela a nnoši, barutiwa ba gagwe ba tla go yena. A ba botšiša a re: “Na batho ba re ke nna mang?”

₁₉Ba mo fetola ba re: “Ba bangwe ba re ke wena Johanese Mokolobetši, ba bangwe ba re o Eliya, mola bangwe ba re yo mongwe wa baprofeta bale ba kgale o tsogile bahung.”

₂₀Yena a ba botšiša a re: “Lena le re ke nna mang?”

Gwa fetola Petrose a re: “Ke wena Mesia wa Modimo.”

₂₁Jesu a ba laya tsebegokwa gore seo ba se ke ba se botša motho. ₂₂A ba a ba botša a re: “Morwamotho o swanetše go tlaišwa kudu le go lahlwa ke bagolo ba setšhaba, le baprista ba bagolo, le boramangwalo. O tla bolawa, eupša ka letšatši la boraro a tsoga bahung.”

₂₃A botša bohle a re: “Ge motho a nyaka go ba molatedi wa ka, a ikone, a ikemišetše go tlo tlaišwa bjalo ka nna, mme a ntatele. ₂₄Gobane yo a ipabalelago o tla lahlega; eupša yo a itatolago ka lebaka la ka o tla phelela sa ruri. ₂₅Etse motho go tla mo holang go rua lefase lohle, ge yena mong a lahlega goba a otlwa go ya go ile? ₂₆Ge motho a se na sebete sa go bolela gore ke yena morutiwa wa ka, goba a se bege tše ke di rutago batho, gona Morwamotho le yena a ka se be le sebete sa go bolela gore motho yoo ke morutiwa wa gagwe, mohla a etla ka letago la gagwe le la Tatagwe le la barongwa ba bakgethwa. ₂₇Ruri, ke le botša gore go na le ba bangwe mo, ba ba ka se kego ba hwa ba se ba bona Modimo a buša.”

₂₈Ge go fetile matšatši a seswai go ba Jesu a bolela ditaba tše, a tloga le Petrose le Johanese le Jakobose, a rotogela thabeng go yo rapela. ₂₉Ya re ge a rapela sefahlego sa gagwe sa fetoga, le diaparo tša gagwe tša taga bošweu bja go re pšoo! ₃₀Gateetee ba bona banna ba babedi ba bolela le yena. E be e le Moshe le Eliya, ₃₁ba be ba tšweletše ka letago mme ba bolela le Jesu ka mokgwa wo a bego a swanetše go hwa ka wona Jerusalema. ₃₂Petrose le ba ba bego ba na le yena ke ge ba ile ka boroko, eupša ba re go phaphama ba bona Jesu a taga, ba bona le banna bao ba babedi ba bego ba eme le yena. ₃₃Ge banna bao ba tloga, Petrose a re go yena: “Mong wa ka, ke mo gobotse bjang ge re le fa! A re hlomeng mešaša ye meraro, wo mongwe e be wa gago, mongwe e be wa Moshe, mongwe e be wa Eliya.” Gape o be a sa tsebe se a se bolelago.

₃₄Ya re a sa bolela gwa tšwelela leru la ba pipetša, gomme ba boifa. ₃₅Gwa kwagala lentšu le etšwa lerung leo le re: “Yo ke yena Morwa wa ka yo ke mo ratago; le mo theeletše!”

₃₆Ge lentšu leo le homola ba bona go šetše Jesu fela. Barutiwa bao ba Jesu ditaba tše ba di homolela; tše ba di bonego mohlang woo ba se di botše motho.

₃₇Ka tšatši le le latelago ge Jesu le barutiwa bale ba gagwe ba bararo ba theoga thabeng, a gahlanetšwa ke lešaba le legolo. ₃₈Monna yo mongwe a goeletša a le gare ga lešaba a re: “Moruti, ke a go rapela, nke o šetše ngwanaka, gobane ke yena morwa wa ka a nnoši! ₃₉Moya wo mobe o fela o mo utlautla, a goeletše, a akgege, a ntšhe maphilo ka molomo; o dula o mo kweša bohloko, gomme o mo tlogela ka sewelo. ₄₀Ke ile ka kgopela barutiwa ba gago gore ba o leleke, eupša ba palelwa.”

₄₁Jesu a mo fetola a re: “Aowii, lena moloko wa go hloka tumelo, wo mokgopo! Ke dule le lena go fihlela neng ke le kgotleletše?” Ke moka a re go monna yola: “Tliša morwago yoo mo.”

₄₂Ya re ge mošemane yoo a etla, modemone yola wa mo utlautla a ba a akgega. Jesu a kgalema moya wo mobe woo a fodiša mošemane, a mmušetša go tatagwe. ₄₃Batho ka moka ba kgotsa maatla a Modimo.

E rile ge batho ba sa kgotsa tšohle tše Jesu a bego a di dira, yena a re go barutiwa ba gagwe: ₄₄“Se ke tlilogo le botša sona le se ke la se lebala: Morwamotho o tlilo gafelwa diatleng tša batho.” ₄₅Fela barutiwa ba gagwe ba se kwešiše se a se bolelago. Se be se ba utagetše ba sa se kwešiše, eupša ba šia go mmotšiša taba yeo.

₄₆Barutiwa ba Jesu ba kile ba tšea kgang ka go re yo mogolo gare ga bona ke mang. ₄₇Jesu a lemoga se ba se naganago, gomme a tšea ngwana a mo emiša ka thoko ga gagwe, ₄₈gomme a re go bona: “Mang le mang yo a amogelago ngwana wa go etša yo ka ge e le se ke le laetšego sona, o amogela nna, le yo a amogelago nna o amogela le yo a nthomilego. Gobane yo e lego yo monyenyane go lena ka moka ke yena yo mogolo.”

₄₉Johanese a re go Jesu: “Mong wa ka, re bone motho yo mongwe a leleka bademone ka go bolela leina la gago, mme ra mo iletša, ka ge e se wa rena.”

₅₀Jesu a re go yena le barutiwa bale ba bangwe: “Le se ke la mo iletša, ka gobane mang le mang yo a sa lwego le lena o ema le lena.”

₅₁E rile ge nako ya gore Jesu a rotogele legodimong e batametše, a ikemišetša go ya Jerusalema gomme a wela tsela a ya gona. ₅₂A roma batseta ba mo eta pele, ba fihla ba tsena motseng wo mongwe ka nageng ya Samaria go mo kgopelela marobalo gona. ₅₃Eupša batho ba gona ba se ke ba mo amogela, ka ge ba be ba bona gore o fetela Jerusalema. ₅₄Ge barutiwa ba gagwe, Jakobose le Johanese, ba di bona, ba re: “Morena, na ga o rate ge re ka ba biletša mollo wa go tšwa legodimong gore o ba fediše?”

₅₅Jesu a retologa a ba kgala. ₅₆Ke moka yena le barutiwa ba gagwe ba fetela go wo mongwe motse.

₅₇Ge ba ntše ba sepela, monna yo mongwe a re go Jesu: “Nna ke tla go latela gohle mo o yago gona.”

₅₈Jesu a re go yena: “Diphukubje di na le ditšaba, le dinonyana di na le dihlaga; Morwamotho yena ga a na mo a fihlago hlogo gona.”

₅₉A napa a re go monna yo mongwe: “Ntatele.”

Eupša yena a mo araba ka go re: “Morena, ntumelele ke yo boloka tate pele.”

₆₀Jesu ge a mo fetola a re: “Lesa bahu ba boloke bahu ba bobona. Wena eya o bege molaetša mabapi le mmušo wa Modimo.”

₆₁Yo mongwe monna a re: “Nna ke tla go latela, Morena, fela ntumelele gore ke yo laela bešo pele.”

₆₂Jesu a re go yena: “Yo a lebelelago morago a swere mogoma a lema, ga se a swanela mmušo wa Modimo.”