MARKOSE 6

₁Jesu a tloga moo a ya motseng wa gabo, mme barutiwa ba gagwe ba mo latela. ₂Ka letšatši la Sabatha a thoma go ruta ka sinagogeng, gomme batho ba bantši ba ba mo kwago ba tlabega, ba botšišana ba re: “Ditaba tše o di tšere kae? Ke bohlale mang bjo a bo filwego bjo? Mehlolo yona o e kgona bjang? ₃Kgane ga se mmetli yola e lego morwa wa Maria, ngwanaboJakobose le Josese le Judase le Simone? Ga ke re le dikgaetšedi tša gagwe di dula le rena?” Gomme a ba kgopiša.

₄Yena a re go bona: “Moprofeta o hlompšha gohle, ge e se ga gabo le melokong ya gabo le lapeng labo.”

₅O ile a se kgone go dira mehlolo felo fao, ge e se go fodiša balwetši ba se ba kae ka go ba bea diatla. ₆A tlabja ke go se dumele ga bona.

Jesu a šika le metse ya tikologo ya Nasaretha a tšama a ruta batho. ₇A bitša barutiwa ba gagwe ba lesome le metšo ye mebedi, a ba roma ka babedi ka babedi, mme a ba fa maatla a go leleka meoya ye mebe bathong. ₈A ba laela a re ba se ke ba tloga le selo, ge e se lehlotlo; a re ba se ke ba tšea mefago, goba mokotla wa mokgopedi, goba tšhelete ka dikhwama tša bona. ₉A re ba rwale dieta, eupša seaparo sa bobedi ba se ke ba se tšea. ₁₀A ba laya a re: “Ge le fihla motseng wo mongwe mme la amogelwa ka lapeng le lengwe, le dule go lona go fihlela ge le tloga motseng woo. ₁₁Ge le ka re le fihla felo batho ba gona ba se le amogele goba ba se le theeletše, le tloge moo le hlohlora marole dinaong tša lena, e be go ba lemoša gore ba tla otlwa ke Modimo.” ₁₂Ba ile ba tloga ba tšama ba begela batho gore ba sokologe. ₁₃Ba leleka bademone ba bantši bathong, ba tlotša balwetši ba bantši ka makhura a mohlware, ba ba fodiša.

₁₄Kgoši Heroda a kwa ka ga Jesu, ka gobane mo gohle batho ba be ba bolela ka yena. Ba bangwe ba be ba re: “Ke Johanese Mokolobetši o tsogile bahung, ke ka lebaka leo a nago le maatla a go dira mehlolo.”

₁₅Ba bangwe ba re: “Ke Eliya.”

Ba bangwe ba re: “Ke moprofeta go etša baprofeta bale ba kgale.”

₁₆Heroda ge a di kwa a re: “Ke Johanese Mokolobetši yola ke mo kgaotšego hlogo, o tsogile bahung.” ₁₇Gape yo ke Heroda yola wa go laela gore Johanese a swarwe. Ba ile ba mo tlema mme ba mo iša kgolegong ka ge Heroda a be a tšere Herodiase, mosadi wa Filipi, ngwanabo. ₁₈Johanese Mokolobetši o ile a sola Heroda a re: “Ga se wa dumelelwa go tšea mosadi wa ngwaneno.”

₁₉Herodiase o be a swere Johanese ka pelo a bile a rata go mmolaya, eupša a palelwa, ₂₀ka gobane Heroda o be a boifa Johanese ka ge a be a lemogile gore ke monna wa go loka yo mokgethwa, ka gona a mo šireletša. O be a rata go fela a mo theeletša, le ge ka mehla a be a kgopišwa ke dipolelo tša gagwe.

₂₁Ka tšatši le lengwe Herodiase a hwetša sebaka. E be e le ka tšatši la matswalo a Kgoši Heroda, mme yena a diretše bahlankedi ba bagolo ba mmušo, le balaodi ba madira, le bagolo ba naga ya Galilea monyanya. ₂₂Gwa tsena morwedi wa Herodiase, mme a bina, a kgahla Heroda le baeng ba gagwe. Ka gona kgoši a re go yena: “Nkgopele se o se ratago, ke tla go fa sona.” ₂₃A mo enela leboelela a re: “Se o ka nkgopelago sona ke tla go fa, le ge e ka ba go go arolela naga ya ka ka bogare.”

₂₄Ka gona mosetsana a tšwa a yo botšiša mmagwe a re: “Ke kgopele eng?”

Mmagwe a re: “Hlogo ya Johanese Mokolobetši.”

₂₅Mosetsana a kitima a boela go kgoši, a fihla a mo kgopela a re: “Ke rata gore o mphe hlogo ya Johanese Mokolobetši ka sebjana gonabjale!”

₂₆Kgoši a nyama kudu, eupša ka lebaka la ge a be a enne pele ga baeng, a se rate go gana. ₂₇A napa a roma moleti wa gagwe yo mongwe a mo laela gore a yo tšea hlogo ya Johanese. Moleti yola a yo kgaola Johanese hlogo ka kgolegong. ₂₈A e tliša ka sebjana a e fa mosetsana, mme mosetsana a e fa mmagwe. ₂₉E rile ge barutiwa ba Johanese ba di kwa, ba tla ba rwala setopo sa gagwe, ba yo se boloka ka lebitleng.

₃₀Baapostola ba boela go Jesu, ba mo anegela tšohle tše ba di dirilego le tše ba di rutilego batho. ₃₁Ka ge batho ka bontši ba be ba etla go yena ba bangwe ba tloga, yena le barutiwa ba gagwe ba ile ba hloka le nako ya go ja. Ka gona a re go bona: “A re yeng mo gongwe mo re ka bago noši, gore le kgone go khutša gannyane.” ₃₂Ke moka ba tloga ka leselawatle, ba ya felo mo gongwe mo go se nago motho.

₃₃Fela batho ba ba bona ge ba tloga, le gona ba bantši ba tseba gore ba ya kae; ka gona ba tloga metseng ka moka ba sepela ka go itlhaganela, mme ba fihla lefelong leo pele ga ge Jesu le barutiwa ba gagwe ba fihla. ₃₄Jesu ge a etšwa ka leselawatleng a bona lešaba leo le legolo, mme a le šokela gobane le be le le bjalo ka dinku tše di se nago modiša; mme a thoma go ba begela ditaba tše dintši tša mmušo wa Modimo. ₃₅E rile ge letšatši le šetše le thapame, barutiwa ba gagwe ba tla go yena ba re: “Letšatši le šetše le thapame, le gona felo fa ke lešokeng. ₃₆Botša batho ba gore ba ye metsaneng le metseng ya kgauswi go ithekela tša go ja.”

₃₇Jesu a ba fetola a re: “Lena ba feng tša go ja.”

Bona ba mmotšiša ba re: “A o ra gore re ye re reke dinkgwa tša dipapetlana tše makgolo a mabedi tša silibera gore re tle re ba fe ba je?”

₃₈Jesu a ba botšiša a re: “Le na le dinkgwa tše kae? Sepelang le yo lebelela gore le na le tše kae.”

Ge ba seno lebelela, ba tla go yena ba re: “Dinkgwa ke tše tlhano, dihlapi ke tše pedi.”

₃₉Jesu a laela barutiwa ba gagwe gore ba dudiše batho ka moka ka dihlopha bjanyeng bjo botala. ₄₀Batho ba dula fase ka dihlopha tša ba lekgolo le tša ba masome a mahlano. ₄₁Jesu a tšea dinkgwa tšela tše tlhano le dihlapi tšela tše pedi, a lebelela legodimong, a tumiša Modimo, a mo leboga. A ngwathaganya dinkgwa tšela, a di nea barutiwa ba gagwe gore ba di abele batho. Dihlapi tšela tše pedi le tšona a di arolela bohle. ₄₂Ka moka ba ja ba khora. ₄₃Barutiwa ba topa marathana a dinkgwa tšela le a dihlapi tšela; gwa tlala diroto tše lesome le metšo ye mebedi. ₄₄Banna ba ba ilego ba ja e be e le ba dikete tše tlhano.

₄₅Jesu a kgareetša barutiwa ba gagwe gore ba tsene ka leselawatleng ba mo ete pele, ba ye motseng wa Betsaida, ka mošola wa letsha, ge yena a sa botša lešaba gore le boele magae. ₄₆E rile ge a seno laelana le bona a rotogela thabeng go yo rapela. ₄₇Mantšiboa ke ge leselawatle le šetše le le gare ga letsha, mme yena a le lebopong a nnoši. ₄₈A bona barutiwa ba gagwe ba le mathateng a go sepediša leselawatle, gobane ba be ba sepela ba lebane le phefo. Ge go esa a tla go bona a sepela godimo ga meetse. O be a nyaka go ba feta, ₄₉eupša bona ba mmona a sepela godimo ga meetse, gomme ba nagana gore ke seriti, ba hlaba mokgoši. ₅₀Bohle ba tšhoga kudu ge ba mmona.

Yena, ntle le go senya sebaka, a re go bona: “Betang dipelo, ke nna! Se boifeng!” ₅₁A tsena ka leselawatleng go bona, mme phefo ya napa ya homola. Barutiwa ba gagwe ba tlabega kudukudu, ₅₂ka ge ba be ba se ba kwešiša gabotse mohlolo wola wa go khoriša banna ba dikete tše tlhano; ba be ba sa kwešiše.

₅₃E rile ge ba tshelela ka mošola wa letsha ya ba ba fihla nageng ya Genesarete, moo ba ilego ba bofa leselawatle la bona lebopong. ₅₄Ge ba etšwa ka leselawatleng batho ba mo tseba ka pela. ₅₅Ba itlhaganela ba ya mo gohle nageng yeo, ba thoma go rwala balwetši ba robetše magogweng a bona, ba ba iša mo ba kwago gore o gona. ₅₆Mo gohle mo a tsenago gona, metsaneng le metseng le merakeng, batho ba be ba bea balwetši mapatlelong a motse mme ba mo rapela gore a ba dumelele go kgwatha le ge e ka ba morumo wa kobo ya gagwe; gomme bohle ba ba o kgwathilego ba be ba fola.