RUTE 1

₁Misi ya vharangaphanḓa ho vhuya ha wa nḓala shangoni, ha vha na muṅwe munna wa muḓi wa Betlehema kha ḽa Juda we a pfuluwa na musadzi wawe na vhana vhavhili vha vhatuka, vha tshi yo ṱunḓa shangoni ḽa Muaba. ₂Uyo munna o vha a tshi pfi Elimelekhe, musadzi wawe a tshi pfi Naumi, vhana vhawe ndi Mahaloni na Khilioni. Vho vha vhe vha Efratha vha Betlehema, shangoni ḽa Juda. Vho ri u swika shangoni ḽa Muaba vha dzula hone.

₃Musi vhe Muaba, Elimelekhe a fa, Naumi a sala na vhatuka vhawe vhavhili. ₄Vhenevho vho dzea vhasadzi vha Vhamuaba, Oripa na Rute. Vha dzula Muaba ha fhela miṅwaha ine ya nga swika fumi, ₅ha vhuya ha fa na Mahaloni na Khilioni vhuvhili havho, mme avho a sala e tshilikadzi, na ṅwana a si tshee na.

₆Musi Naumi a tshee Muaba, a pfa uri Muṋe washu o dovha a tonda vhathu vhawe a vha ṋea zwiḽiwa. Ndi hone a tshi ḓilugisa na vhasadzi vha vhana vhawe, a tshi ri u humela hayani, ₇a mbo takuwa he a vha a tshi dzula hone, a fara lwendo e na vhomazwale vhawe vhavhili a tshi vhuelela shangoni ḽa Juda.

₈Musi vhe nḓilani, Naumi a amba na vhomazwale vhawe a ri, “Humani ni ye mahayani aṋu ha vhomme aṋu; ngavhe Muṋe washu a tshi ni tonda u ḓi nga inwi no ntonda na vhana vhanga zwiḽa vha tshee hone. ₉Ngavhe Muṋe washu a tshi dovha a ni ṋea vhanna, na dzula nga mulalo.” Ndi hone a tshi vha kuvhatedza a tshi ri u onesana navho.

Vhone vha mbo ḓi thoma u lila vha tou ṱavha mukosi, ₁₀vha ri, “Aiwa nandi, ri ṱuwa navho vha tshi vhuelela ha havho!”

₁₁Naumi a si tende, a ri, “Hai nandi vhananga, zwi nga farisa mini ni tshi ṱuwa na nṋe? Kani-ha ndi nga dovha nda beba vhatuka vha vha vhanna vhaṋu? ₁₂Humani zwaṋu, hufha ndo no kegula, ndi nga si tsha wana munna. Hone naho zwo vha zwi tshi nga itea uri ndi vhe na munna vhusiku ha ṋamusi nda beba vhana vha vhatuka, ₁₃no vha ni tshi nga kona u lindela vha vhuya vha aluwa naa? No vha ni tshi nga landula vhaṅwe vhanna nó lindela vhana vhanga vha tshi thoma u aluwa naa? Aiwa nandi vhananga! Hafhu nṋe zwi a mmbavha u fhira inwi, tshanḓa tsha Muṋe washu tsho nnziamedza.”

₁₄Naumi a ri u ralo vha mbo dovha u lila vha tou ṱavha mukosi. Ndi hone Oripa a tshi kuvhatedza mazwale wawe a onesana nae, hone Rute a mu nambatela. ₁₅Naumi a mu kwengweledza a ri, “Hufha murathu waṋu o humela ha hawe hu na midzimu yawe, a ni mu tevheli?”

₁₆Rute a fhindula a ri, “Vha songo nkombetshedza u vha ṱutshela, hune vhone vha ya, na nṋe ndi ya navho; hune vha ḓo dzula hone, na nṋe ndi ḓo dzula henefho; lushaka lwa havho, na nṋe ndi lushaka lwanga; Mudzimu wavho na nṋe ndi Mudzimu wanga; ₁₇hune vha fela hone, na nṋe ndi ḓo fela hone nda swiṱwa henefho; ngavhe Muṋe washu a tshi nthwa a dovha arali nda tenda u fhandekanywa navho; na lwone lufu a lu nga ri fhandekanyi!”

₁₈Naumi a tshi vhona uri Rute o ḓiimisela u ṱuwa nae, a si tsha mu dzivhisa. ₁₉Vha mbo fhirela phanḓa vhoṱhe vha vhuya vha swika Betlehema. Musi vha tshi swika, phungo yavho ya mbo ṱanganya muḓi wa Betlehema, vhafumakadzi vha amba nga tshavho vha ri, “Nṋa ndi Vho-Naumi avha?”

₂₀Naumi ene a ri, “A thi tsha pfi Naumi (Tshinakaho), ndi vho pfi Mara (Zwiavhavha), ngauri Ramaanḓaoṱhe o nnyita zwi vhavhaho vhukuma. ₂₁Ndo ṱuwa ndi na muṱa, Muṋe washu a mmbuisa ndi si na tshithu. Ni kha ḓi mmbidzelani nga ḽa Naumi, hufha Muṋe washu o ntambudza, hufha Ramaanḓaoṱhe o nndivhanya na zwi lemelaho.”

₂₂Ngauralo Naumi o vhuya a tshi bva Muaba na mazwale wawe, Rute wa Mumuaba. Vho swika Betlehema vhathu vha tshi tou thoma u kaṋa bali.