Tsalela dza Benyamini dzi tshi ṱoḓelwa vhasadzi
1Zwiḽa Vhaisraele vho kuvhangana Mitsipha vho anela Muṋe washu vha ri, “A hu nga vhi na muthihi washu ane a ḓo tenda muthu wa Benyamini a tshi dzea ṅwananyana washu.” 2Zwino ndi hone Vhaisraele vha tshi ya Bethele, vha dzula henefho phanḓa ha Mudzimu ḽa vhuya ḽa kovhela. Vha ṱavha mukosi, vha lila lu ṱungufhadzaho, vha tshi ri, 3“Muṋe washu Mudzimu wa Israele, ndi mini zwo raliho zwo itea kha Vhaisraele? Ḽiṅwe tsinde ḽa Israele ṋamusi a ḽi tsheeho!”
4Ḽi tshi tsha vhathu vha fhaṱa aḽiṱari henefho, vha ṋekedza zwiṱhavhelo na nduvho dza vhuthihi. 5Vha vhudzisa vha ri, “Kani hu na tshigwada tsha matsinde a Israele tshi songo yaho guvhanganoni phanḓa ha Muṋe washu ngei Mitsipha?” (Ndi uri vho vha vho ana vho tou khwaṱhisa uri nnyi na nnyi a songo yaho Mitsipha a vhulawe.) 6Vhaisraele vha pfela vha havho vha tsinde ḽa Benyamini vhuṱungu vha ri, “Ṋamusi ḽiṅwe tsinde ḽo tumulwa kha Israele. 7Ndi tshini tshine ra nga ita uri vhanna vha Benyamini vho salaho vha wane vhasadzi? Ro anela Muṋe washu uri a ri nga vha ṋei na muthihi wa vhananyana vhashu.”
8Musi vha tshi vhudzisa arali hu na tshigwada tsha matsinde a Israele tshi songo yaho guvhanganoni ḽa Mitsipha, vha wana uri henefho ho vha hu si na na muthihi a no bva Jabeshe kha ḽa Giliadi; 9hu tshi vhidzwa madzina a mmbi a ho ngo vha na muthihi a no bva Jabeshe we a fhindula. 10Ndi hone vha itsho tshivhidzo vha tshi ruma vhahali vhavho na ndaela i no ri, “Tshimbilani ni yo vhulaha vhoṱhe vha Jabeshe, khathihi na vhasadzi na vhana. 11Vhulahani vhanna vhoṱhe na vhasadzi vhoṱhe vho no ḓivhaho munna.” 12Kha vhenevho vhathu vha Jabeshe vha wana hu na vhasidzana vha 400 vha sa athu ḓivha munna, zwenezwo vha vha ḓisa mishashani ya Shilo shangoni ḽa Kanana.
13Ndi hone tshivhidzo tshoṱhe tshi tshi ruma muḓinḓa ha vhathu vha Benyamini vhe vha vha vhe Tomboni ḽa Rimoni vha ri nndwa nga i fhele. 14Vha Benyamini vha vhuya, vhaṅwe Vhaisraele vha vha ṋea vhasidzana vha no bva Jabeshe vhe vha si vha vhulahe. Hone vho vha vha songo eḓana.
15Vhathu vha pfela vha Benyamini vhuṱungu nge Muṋe washu a ita uri matsinde a Israele vha si tsha vha vhathihi. 16Ndi hone vharangaphanḓa vha tshivhidzo vha tshi ri, “A hu tshee na vhasadzi kha tsinde ḽa Benyamini. Ri ḓo ita mini uri vhanna vho salaho ri vha wanele vhasadzi? 17Vhaisraele vha songo xelelwa nga ḽiṅwe ḽa matsinde avho a 12. Ro fanela u wana nḓila ya uri tsinde ḽa Benyamini ḽi ḓi sala ḽi hone, 18hone a ri koni u vha tendela vha dzea vhananyana vhashu, ngauri ro teketela muṅwe na muṅwe washu ane a nga tenda wa Benyamini a tshi dzea ṅwana wawe.”
19Vha elekanya vha ri, “Hu ḓo ṱuwa hu tshi vha na vhuṱambo ha Muṋe washu ha ṅwaha nga ṅwaha muḓini wa Shilo.” (Shilo ndi devhula ha Bethele, tshipembe ha Lebona, vhubvaḓuvha ha gondo ḽi re vhukati ha Bethele na Shikheme.) 20Vha vhudza vha Benyamini vha ri, “Iyani u lalela masimuni a minḓirivhe 21ni linde. Musi vhasidzana vha Shilo vha tshi bva vha tshi yo tshina nga tshifhinga tsha vhuṱambo, ni dzumbuluwe hafho masimuni a minḓirivhe; muṅwe na muṅwe waṋu a dzhie musadzi nga khani kha avho vhasidzana, a ṱuwe nae a mu ise shangoni ḽa Benyamini. 22Arali vhokhotsi avho kana khaladzi dzavho vha ḓa ha riṋe vha ri sengisa, ri ḓo vha vhudza ra ri, ‘Litshani vha dzule navho ngauri vhe ra vha wana nndwani a vho ngo lingana. Inwi a ni na mulandu wa u pfuka muano waṋu, hufha ni songo tou vha ṋea vhone.’ ” 23Vhathu vha Benyamini vha ita zwenezwo, muṅwe na muṅwe wavho a nanga musadzi kha vhasidzana vhe vha vha vha tshi khou tshina afho Shilo, a mu hwala a ṱuwa nae. Ndi hone vha tshi humela shangoni ḽa havho, vha vusa miḓi yavho vha dzula khayo. 24Ndi hone na vhaṅwe Vhaisraele vha tshi ṱuwa afho fhethu, vha humela hayani ha matsinde avho na miṱa yavho na masimuni avho.
25Misi yeneyo ho vha hu si na khosi Israele. Muṅwe na muṅwe o vha a tshi sokou ita zwine a vhona zwo fanela.
