RUTE 2

₁Elimelekhe munna wa Naumi o vha e na shaka ḽi no pfi Buasi, muḓivhalea o pfumaho.

₂Ḽiṅwe ḓuvha Rute wa Mumuaba a amba na Naumi a ri, “Kha vha litshe ndi ye masimuni ndi yo ṱala ṱhalane tsimuni ya onoyo ane a nga ntendela.” Naumi a ri, “Ndi zwone ṅwananga.”

₃Rute a ya masimuni, a tshenuwa ó swika tsimuni ya Buasi shaka ḽa Elimelekhe, a ṱala ṱhalane a tshi tevhela vhakaṋi. ₄Buasi a mbo swika masimuni a tshi bva Betlehema, a reshana na vhakaṋi a ri, “Muṋe washu a vhe na inwi!” Vhone vha mu fhindula vha ri, “Muṋe washu a vha shudufhadze!” ₅Buasi a vhudzisa mulangi wa vhakaṋi a ri, “Uḽa musidzana ndi wa nnyi?” ₆A fhindula a ri, “Ndi uḽa musadzi wa Mumuaba we a vhuya na Naumi shangoni ḽa Muaba. ₇O humbela u ṱala ṱhalane dzo wiswaho nga vhakaṋi. Tshi tsheetsho tshe ḽa tsha ha aweli, ndi hone o thoma u awelanyana zwino murunzini.”

₈Ndi hone Buasi a tshi amba na Rute a ri, “Edzonu pfa ṅwananga, ni songo vhuya na ṱuwa na yo ṱala ṱhalane tsimuni ya muṅwe, tshaṋu ni tou ṱwa na vhashumi vhanga vha vhasidzana. ₉Konḓelelani afha tsimuni ni tshi tevhela vhakaṋi, ndo vha vhudza uri vha songo ni dina. Na pfa ḓora ni ye mvuvheloni hedziḽa ni nwe maḓi e vhakaṋi vha ḓikela.”

₁₀Rute a mbo ḓi gwadama a losha a ri, “Vha nga nnyita hani nga vhuthu, vha vhuya vha tou ḓidina nga nṋe, hufha ndi mutsinda?”

₁₁Buasi a fhindula a ri, “Ndi uri ndo pfa zwoṱhe zwe na itela mazwale waṋu musi vho felwa nga munna, na tou ṱutshela khotsi aṋu na mme aṋu na shango ḽa haṋu na ḓa fhano ha hashu he na vha ni sa hu ḓivhi. ₁₂Ngavhe Muṋe washu a tshi ni pfufha a tevhedza zwivhuya zwe na ita. Ngavhe Muṋe washu Mudzimu wa Israele we na ḓa u khuda nga phapha dzawe a tshi ni ṋea pfufho khulu.”

₁₃Rute a ri, “Muṋe wanga, vha nnyitela vhuthu vhungafha na tshilidzi, vha amba na nṋe nga vhulenda, nṋe ndi sa vhuyi nda vha muṅwe wa vhashumi vhavho!”

₁₄Nga tshifhinga tsha u ṅwata, Buasi a mu vhidza a ri, “Sendelani ngeno ni ḽe, ṅwatani zwaṋu ni thothe kha muthotho washu wa nḓirivhe.” Rute a dzula fhasi na vhakaṋi, Buasi a mu ṋea goroi yo hadzingwaho, a ḽa a fura ya ita na u sala, ₁₅a takuwa a isa phanḓa u ṱala ṱhalane. Buasi a laya vhakaṋi a ri, “Mu litsheni a ṱale na vhukati ha khuḽane dzo no vhoxwaho, ni songo mu halifhela, ₁₆nahone ni ite ni tshi ṱomola khaṱha kha khuḽane ni wisele fhasi uri a kone u doba, ni songo mu kaidza.”

₁₇Rute a ḓi ṱala ṱhalane ḽa vhuya ḽa kovhela. A tshi fhula bali a wana o ṱoḓou swikisa khilogiramu dza 13. ₁₈A i dzhia a humela muḓini. Mazwale wawe vha vhona uri o ṱala nngafhani, a dovha a vha ṋea na yo hadzingwaho ye a sia musi o no ḽa a fura. ₁₉Vha mu vhudzisa vha ri, “No i ṱala ngafhi? No ṱala tsimuni ya nnyi ṋamusi? Ngavhe Muṋe washu a tshi shudufhadza onoyo munna we a ni tonda nga u rali!”

Ndi hone Rute a tshi vha vhudza zwoṱhe zwe a ita tsimuni, a vha vhudza na uri muṋe wa tsimu iyo ndi Buasi. ₂₀Naumi a ri, “Ngavhe Muṋe washu a tshi shudufhadza uyo munna, ngauri hu riṋe ri tshilaho, hu vhanna vhashu vho faho, Muṋe washu o ri itela vhuthu roṱhe; hoyo munna ndi shaka ḽashu, ndi muṅwe wa vhalamuleli vhashu.”

₂₁Rute wa Mumuaba a ri, “O dovha a mmbudza uri ndi ṱwe na vhakaṋi vhawe khaṋo i vhuye i fhele.” ₂₂Naumi a fhindula a ri, “Zwo naka ṅwananga, ni ṱwe na vhashumi vhawe vha vhasidzana, tsimuni ya muṅwe vhathu vha nga ni kolela.”

₂₃Nangoho Rute a ḓi ṱwa na vhashumi vha Buasi ha vhuya ha fhela khaṋo ya baḽi na ya goroi, hayani a tshi ḓi dzula na mazwale wawe.