DZIPHISALEMA 9

₁Ndi ḓo u renda nga mbilu yanga yoṱhe Muṋe washu,

maḓembe au oṱhe ndi ḓo a anea.

₂Ndi ḓo takala nda tou pembela ndi tshi humbula Iwe.

Ndi renda dzina ḽau nga nyimbo,

Iwe Waṱaḓuluṱaḓulu,

₃ndi tshi vhona maswina anga o no shakuliswa,

vha tshi gobagoba vha wa vha lovha phanḓa hau.

₄Ndi Iwe wo onyolosaho mulandu wanga,

mafhungo a naka.

Wo ya wa dzula kha khuluṋoni yau,

Iwe Muhaṱuli a sa ṱaluli.

₅Wo tshenusa vhannḓa wa lozwa vhavhi,

dzina ḽavho ḽa si tsha dovha ḽa elelwa lini na lini.

₆Maswina o fhela tshoṱhe,

ha sala marubi fhedzi u swika lini na lini,

miḓi yavho wo i thuthekanya ya mbo ḓi hangwiwa tshoṱhe.

₇Hone Muṋe washu u ḓo ḓi dzula e hone lini na lini,

khuluṋoni yawe o dzula o i tika uri a haṱule.

₈Shango u ḓo ḽi haṱula a sa ṱaluli,

dzitshakha u ḓo dzi haṱula nga khaṱhulo i sa khakhi.

₉Muṋe washu ndi dzhavhelo ḽa vho kandeledzwaho,

ndi Ene bako ḽa vhukhudo musi wa u khakhedzwa.

₁₀Vhane vha u ḓivha nga vha fulufhele Iwe,

Iwe Muṋe washu a u laṱedzi vhane vha shavhela kha iwe.

₁₁Muṋe washu a dzulaho Tsioni

mu rendeni nga nyimbo,

ḓivhadzani dzitshakha mishumo yawe.

₁₂Ha hangwi tshililo tsha vhaheḓana,

u a vha elelwa a vha lifhedzela.

₁₃Yawee Muṋe washu,

nnyitele tshilidzi,

sedza vhutshena vhune nda vha khaho nga mulandu wa vha mmbengaho;

ndi Iwe une wa nndamukisa mulomoni wa i ḽaho,

₁₄uri ndi u rende

phanḓa ha vhathu vhoṱhe vha Tsioni,

ndi pembele nge wa ntshidza.

₁₅Vhannḓa vhone,

khunḓa yo fasha muvei,

gwekwe ḽo fasha murei.

₁₆Muṋe washu u ḓivhelwa u haṱula hawe;

asizwi-ha,

kha muvhi vhutulu ho ḽa mufhomi.

₁₇Vhavhi vhoṱhe vha ḓo tsetsa vha guma nga vhudzulavhafu,

khathihi na tshakha dzoṱhe dzine dza hangwa Mudzimu.

₁₈Vhashai a vha nga hangwiwi tshoṱhe,

zwe vhaheḓana vha lavhelela zwi ḓo vhuya zwa wanala.

₁₉Yawee Muṋe washu, takuwa!

U songo tenda hu tshi kunda muthu wa ṋama,

vhannḓa nga vha haṱulwe phanḓa hau.

₂₀Muṋe washu, vha shele nyofho,

dzitshakha dzi ḓivhe uri vha tou vha vhathu vha ṋama.