DZIPHISALEMA 10

₁Muṋe washu,

khezwi wo tou ima ngeo kule?

U itelani u tshi ḓidzumba musi zwo vhifha?

₂Vhavhi vha a ḓihudza

vha kandeledza vhaheḓana.

Khunḓa nga i fashe muvei.

₃Muvhi u zuwa nyemulo dza mbilu yawe,

wa u ḽeledza vhaṅwe

u sanda Muṋe washu a mu nyadza.

₄Muvhi u dzula o imisa mutsinga.

U ri, “Mudzimu ha nga nndifhedzi.”

U luka maano awe oṱhe a sa humbuli Mudzimu.

₅Mishumo yawe i ḓo ḓi ya phanḓa;

khaṱhulo dzau dzi fhira ṱhalukanyo yawe;

maswina awe oṱhe u vha pfela mare.

₆Mbiluni yawe u ri,

“A hu na tshi ḓaho;

mirafho i ḓo ṱanḓulukana ndi sa welwi nga khombo.”

₇Haṋwani hawe hu bva a u teketela na vhufhura na u tsikeledza vhaṅwe;

lulimi lwawe lwo mara ndozwo na vhuvhi.

₈U dzula o lalela khuḓani dza miḓi,

a zwizwiedza a si na mulandu,

vhaheḓana u dzula a tshi vha zwikula nga maṱo.

₉U dzula o lalela sa ndau yo dzumbama,

u lalela muheḓana a tshi ri a mu fashe,

a ritha tshifu ha vha u mu fasha,

₁₀muheḓana a mbo ḓi fhasi huru o huvhala,

ha vha hone u wa hawe a nga o vetekanywa nga ṋala.

₁₁Mbiluni yawe muvhi u ri,

“Mudzimu o zwi hangwa;

ha nga vhuyi a zwi vhona,

o tsinya iṱo.”

₁₂Mudzimu Muṋe washu,

angaladza tshanḓa tshau:

u songo laṱedza muheḓana.

₁₃Nṋa muvhi u itwa ngani a tshi nyadza Mudzimu?

Mbiluni yawe u ri a u nga mu lifhedzi.

₁₄Matsina Iwe wo zwi vhona,

a u kundwi u vhona vhuleme na u tambula.

Zwi iteaho u zwi dzhiela nzhele.

Muheḓana u ḓikumedza Iwe,

zwisiwana zwi lilela kha Iwe.

₁₅Vunḓekanya tshanḓa tsha muvhi wa vhunwa,

vhuvhi hawe u vhu sale murahu

u gume nga mudzi waho.

₁₆Muṋe washu ndi khosi u ya ho ya,

tshakha dza vhannḓa o dzi swiela shangoni ḽawe.

₁₇Muṋe washu,

Iwe wo pfa zwine muheḓana a zwi lila.

U ḓo khwaṱhisa mbilu yawe,

u dzula wo thetshelesa,

₁₈uri u lamulele zwisiwana na vho kandeledzwaho,

muthu wa ṋama wa fhano shangoni a si tsha ḓo ofhisa vhaṅwe.