DZIPHISALEMA 65

₁Mudzimu,

wo tewa nga thendo Tsioni,

zwe ra u anela zwi ḓo khunyeledzwa;

₂u pfa thabelo dzashu;

vhathu vhoṱhe vha ḓo ḓa ha Iwe

₃vha tshi ḓiswa nga milandu yavho.

Nangwe vhutshinyi hashu ho ri tsikeledza,

Iwe u ri hangwela hone.

₄Wa mashudu ndi uyo ane wa mu nanga,

wa mu sendedza tsini,

a dzula pfamoni dzau.

U ḓo fushwa nga zwivhuya zwa nḓuni yau,

zwa thembele yau khethwa!

₅Iwe Mudzimu Mutshidzi washu,

u a fulufhedzea;

u pfa thabelo dzashu,

wa ita zwi ofhisaho.

Ḽifhasi ḽoṱhe nga he ḽa guma,

na malwanzhe a kule-kule,

zwo fulufhela Iwe.

₆Wo tika dzithavha nga maanḓa au;

wo fuka nungo.

₇Iwe u dzikisa u unga ha malwanzhe na phosho ya magabelo ao,

wa ladza mifhirifhiri ya dzitshakha,

₈uri vha dzulaho kule-kule mugumoni wa ḽifhasi

vha ofhe maḓembe au.

U ita uri vhubvaḓuvha na vhukovhela hu pembelwe nga dakalo.

₉U londola ḽifhasi wa ḽi ṋea ndalo,

wa ḽi pfumisa zwihulu;

madzambo au o ḓala maḓi,

uri vhathu vha kaṋe khaṋo khulu.

U zwi ita nga u rali:

₁₀He vha lima u hu nisela mvula,

wa hu ṋukadza nga maḓi,

mavu u a ṋukadza nga vhusuṱo,

wa shudufhadza zwa aluwa.

₁₁U ambadza ṅwaha tshiala tsha khaṋo khulu;

hune wa fhira hone hu ela mapfura;

₁₂na pfulo ya phangani i a anda,

mivhundu ya ambara dakalo;

₁₃mafulo a tshatshama miṱambi ya nngu,

magovha a ḓala mavhele,

a pembela, a imba nga dakalo.