DZIPHISALEMA 66

₁Ḽifhasi ḽoṱhe nga ḽi pembelele Mudzimu,

₂hulisani dzina ḽawe nga nyimbo,

mu imbeleni thendo!

₃Vhudzani Mudzimu ni ri,

“Mishumo yau i ofhisa hani!

Maanḓa au ndi mahulu;

maswina au u a khothisa phanḓa hau a luvha.

₄Ḽifhasi ḽoṱhe ḽi a u luvha ḽo gwadama,

vha u renda nga nyimbo,

vha renda dzina ḽau.”

₅Iḓani ni vhone zwimangadzo zwe Mudzimu a ita;

zwe a itela vhathu ndi zwihulu:

₆o xisa lwanzhe ha sala ho oma,

vha wela mulambo nga milenzhe.

Henefho ndi he ra mu takalela,

₇Ene a vhusaho nga maanḓa awe lini na lini.

Maṱo awe a dzula o sedza dzitshakha;

mavhanga a songo tsha ḓihudza.

₈Inwi dzitshakha,

rendani Mudzimu washu,

mu imbeleni thendo!

₉Ndi Ene a ri tshidzaho,

ha litshi milenzhe yashu i tshi redzemuwa.

₁₀Mudzimu, wo ri linga nga mulilo,

wa ri kulutedza unga siliva.

₁₁Wo ri dzhenisa mambuleni,

wa ri hwesa mihwalo i lemelaho,

₁₂wo litsha vhathu vha tshi ri tumba nṱha ha ṱhoho;

ro fhira nga muliloni na maḓini,

ra kona u ḓiphiṋa nga zwinzhi.

₁₃Ndi ḓo ḓisa nduvho dzi fhiswaho nḓuni yau,

nda khunyeledza zwe nda u anela,

₁₄zwe nda amba nga mulomo wanga musi ndi khomboni.

₁₅Ndi ḓo u ṋekedza zwiṱhavhelo zwo nonaho,

na thutha dzi nukhelelaho dzi tshi fhiswa,

ndi ḓo ṋekedza dzimboho na mbokoṱo.

₁₆Iḓani ni pfe,

noṱhe ni ofhaho Mudzimu,

ndi ḓo ni vhudza zwe a nnyitela:

₁₇ndo mu ṱavhela mukosi,

a mbo ḓi nndamulela,

lulimi lwanga lwa mu renda.

₁₈Ngavhe mbiluni yanga hu na vhuvhi,

ndi musi Muṋe wa zwoṱhe a songo nthetshelesa.

₁₉Hone ngoho Mudzimu o nthetshelesa a pfa thabelo yanga.

₂₀Nga hu rendwe Mudzimu,

ho ngo landula thabelo yanga,

lufuno lwawe a lwo ngo vhuya lwa dzinginyea.