DZIPHISALEMA 64

₁Mudzimu,

ipfa ipfi ḽanga ndi tshi u lilela,

ntsireledze kha maswina haya a ofhisaho;

₂nnzumbe ndi si fashwe nga zwikwekwe zwa vhavhi,

ndi ponyoke milavhu ya vhaitazwivhi.

₃Vha ṱuṱula ndimi dzavho unga mapanga,

vha pfula nga maipfi avho a no nga misevhe ya vhutulu;

₄vha pfula a si na mulandu vhó mu lalela,

vha mu pfula kathihi fhedzi vha sa ofhi.

₅Vha ṱuṱuwedzana u ita vhuvhi,

vha langana hune vha ḓo rea zwikwekwe zwavho

nga tshiphiri,

vha ri, “Ri ḓo vhonwa nga nnyi?

₆Ro luka vhukwila hone-hone;

u nga si ḓivhe tsha thumbuni ya fuyu.”

₇Hone Mudzimu u ḓo vha pfula nga wawe musevhe,

vha ḓo tshenuwa vho no phulwa mbonzhe;

₈u ḓo vha lozwela ndimi dzenedzo dzavho.

Vhoṱhe vhane vha vha vhona vha tshi wa

vha ḓo dzungudza dziṱhoho dzavho.

₉Ndi hone vhoṱhe vha tshi ḓo ofha,

vha vhudzana zwe Mudzimu a ita vha zwi ṱalukanya.

₁₀Vha no fulufhedzea vhone vha ḓo takalela Muṋe washu,

vha khuda ngae,

vhoṱhe vha si na vhufhura vha ḓo kona u zuwa.