DZIPHISALEMA 63

₁Mudzimu, u Mudzimu wanga,

ndo u ṱuvha;

ndo u ṱulutshela nga mbilu yanga yoṱhe,

zwa nga nḓala na ḓora,

ndí fhano shangoni ḽo omaho,

ḽo bvaho,

hu si na maḓi.

₂Ndo ṱuvha u u ṱalela nḓuni khethwa,

uri ndi vhone maanḓa au na vhugala.

₃Lufuno lwau lu ntakadza u fhira na vhutshilo;

mulomo wanga u ḓo u renda.

₄Ndi ḓo u livhuha vhutshilo hanga hoṱhe,

nda imisa zwanḓa zwanga ndi tshi u rabela.

₅Ndi fushea nga Iwe nda nga ndo ḽa mapfura;

mulomo wanga u ḓo u renda nga nyimbo.

₆Ndó lala ndi a u humbula,

ndi u elekanya vhusiku hoṱhe.

₇Iwe wo ḓi vha Mutikedzi wanga;

ndi fhululedza nga dakalo ndó khuda nga phapha dzau.

₈Mbilu yanga i nambatela Iwe,

ndi tikiwa nga tshanḓa tshau tsha maanḓa.

₉Vhane vha ṱoḓa u mmbulaha

vha ḓo godimela fhasi-fhasi dindini ḽa ḽifhasi;

₁₀vha ḓo ḽiwa nga pfumo

vha vha zwiḽiwa zwa dziphunguhwe.

₁₁Ndi hone khosi i tshi ḓo pembelela Mudzimu,

vhoṱhe vhane vha ana ngae vha mu zuwa,

milomo ya mazwifhi yó no fhumudzwa.