DZIPHISALEMA 62

₁Musi ndi na Mudzimu,

ndi hone ndo rudza mbilu,

ndi Ene a ntshidzaho.

₂Ndi Ene fhedzi a re bako ḽanga na Mutshidzi wanga;

Mutsireledzi wanga ndi Ene,

a thi nga sudzuluswi.

₃Nṋa ni ḓo litsha lini u sala muthu murahu?

Noṱhe ni khou mu khokhovhedza

na nga ni khou khurumedza luvhondo lwo tshingamaho,

ni khou fuḓa luhura lwo waho.

₄Ni langana u mu dzhiela vhuhulwane hawe;

ni takalela mazwifhi;

ni shudufhadza nga milomo,

mbiluni ni tshi mu teketela.

₅Musi ndi na Mudzimu,

ndi hone ndo rudza mbilu,

ndi fulufhela Ene fhedzi.

₆Ndi Ene fhedzi a re bako ḽanga,

na Mutshidzi wanga;

Mutsireledzi wanga ndi Ene, a thi nga dzinginyei.

₇Mudzimu ndi Ene Mutshidzi wanga,

u a nkhulisa;

tombo ḽanga ḽa maanḓa,

vhukhudo hanga,

ndi Mudzimu.

₈Inwi vhathu, fulufhelani Ene misi yoṱhe,

mu ṱanzeleni zwoṱhe zwa mbiluni dzaṋu;

Mudzimu ndi Ene vhukhudo hashu.

₉Vhathu vhone vha tou vha mufemo,

na vhahulwane a si tshithu;

naho vha fhanzhelwa tshikaloni tshithihi,

vha kha ḓi fhirwa nga mufemo.

₁₀U songo ḓitika nga u kandeledza vhaṅwe;

vhuvemu vhu nga si u vhuedze tshithu;

arali lupfumo lu tshi anda

u songo vhea mbilu yau khalwo.

₁₁Ndo pfa Mudzimu a tshi amba a dovha,

a tshi ri maanḓa ndi awe.

₁₂Lufuno lu sa dzinginyei ndi lwa Iwe Muṋe wa zwoṱhe.

Iwe u pfufha muthu u tshi tevhedza mishumo yawe.