Thabelo ya nga madekwana
Phisalema ya Dafita ye a sikela malogwane; i pfi i imbiwe hu tshi lidzwa mbila.
Thikho ya fulufhelo
1Aravha ndi tshi vhidzelela
Iwe Mudzimu Mulamuleli wanga!
Ndo vha ndo khakhedzwa,
Iwe wa nndamukisa;
zwino nnyitele tshilidzi
u pfe thabelo yanga.
U fhindula vhomutekateki
2Hee inwi vhanna, nṋa ni ḓo litsha lini
u shandula vhugala hanga na vhu ita vhuḓabaḓaba?
Ni ḓo litsha lini u ḓikumedza mahandana
na u tevhela mazwifhi?
3Ḓivhani uri Muṋe washu o ḓikhethela nṋe
mulanda wawe a fulufhedzeaho.
Muṋe washu u a pfa ndi tshi mu vhidzelela.
U fhindula vha na mbiti
4Na u sinyuwa háṋu, ni songo tshinya.
Na musi ni malaloni,
tshi vhe tshilomondundundu.
5Bvisani zwiṱhavhelo zwo teaho,
ni ḓitike nga Muṋe washu.
U fhindula vho no ṱovhowaho
6Hu na vhanzhi vhane vha ri,
“Ngavhe zwi tshi tou dovha zwa ri nakela nandi!”
Vha ri, “Iwe Muṋe washu,
dovha u ri penyisele tshedza tsha tshifhaṱuwo tshau,
u ri farise.”
7Hone nṋe mbilu yanga wo i ḓadza dakalo
ḽine ḽa fhira ḽavho
naho vho fura zwiḽiwa na waini.
Tshi no rudza mbilu
8Zwino ndo lala ndo rudza mbilu
nda fara khofhe;
Iwe Muṋe washu, ndi Iwe u woṱhe
une wa nnzudza ho khudaho.
