Thabelo ya nga matsheloni ya u humbela u lamulelwa nga Mudzimu
Phisalema ya Dafita ye a sikela malogwane; i pfi i imbiwe hu tshi lidzwa tshiṱiringo.
U bubela thabelo
1Muṋe washu,
thetshelesa zwine nda amba,
u pfe u fhihamelwa hanga!
2Iwe Khosi yanga, Mudzimu wanga,
ipfa ndi tshi u ṱavhela mukosi!
Hufha ndi tshi rabela Iwe.
3U mpfe ndi tshi u rabela nga matsheloni.
Ndi vhea thabelo yanga phanḓa hau ḽi tshi tsha,
nda lindela phindulo yau.
Mudzimu Mulwela-zwi-re-zwone
4Hufha u si Mudzimu a no takalela vhuvhi.
Muvhi a u koni u mu swielela.
5Matsilu a u funi u a vhona phanḓa hau,
u vhenga vhaitazwivhi.
6Vhadziauzwifha u a vha lozwa vhoṱhe.
Muṋe washu u nengwa mufhaladzamalofha na pheṱhi.
U takalela nnḓu ya Mudzimu
7Hone nṋe nga vhuthu hau
ndi ḓo dzhena nḓuni yau,
nda gwadama nda fhelela nga u ofha Iwe
ndó livhana na thembele yau khethwa.
8Muṋe washu,
nthange phanḓa nga vhuvhuya hau;
maswina anga khea o dzula o lavhelesa.
Ntshimbidze nḓilani yau i si ya magombikwa.
U haṱulwa ha vhadziamazwifhi
9Zwine vhathu avha vha amba a zwi fulufhedzei,
mbiluni dzavho hu fhufhuma khombo fhedzi.
Ndimi dzavho ndi dza u swaledzela,
hone zwiambo zwavho zwi tshi bwela muthu tshalo.
10Mudzimu, vha lifhedze,
khunḓa nga i fashe muvei.
Vha kudze kule,
mivhango yavho a i fheli,
vho u shandukela.
Tshiṱangu tsha mufulufheli
11Hone litsha vha khudaho nga Iwe vha pembele,
vha litshe vha fhululedze nga hu sa fheli;
tsireledza vhane vha funa dzina ḽau uri vha ḓiphiṋe ngaḽo.
12Iwe Muṋe washu u ḓo shudufhadza a no fulufhedzea,
u ḓo mu tanga nga lufuno
lwa tou nga tshiṱangu.
