DZIPHISALEMA 32

₁Mashudu we a hangwelwa vhutshinyi,

we vhukhakhi hawe ha fukedzwa.

₂Wa mashudu ndi uyo ane Muṋe washu

a si tsha mu vhalela milandu,

a si na vhufhura mbiluni.

₃Nṋe ndo ri ndi sa athu bula vhutshinyi hanga

nda lwala lwe nda tou honḓa ḓuvha ḽoṱhe;

₄tshanḓa tshau tsho nnziamedza vhusiku na masiari,

nda fhelelwa nga nungo

unga murongwe u tshi fhufha

nga biso tshilimo.

₅Ndi hone ndi tshi bula vhutshinyi hanga,

ndi si tsha dzumba mulandu wanga.

Ndo ri,

“Ndi ḓo bulela Muṋe washu vhukhakhi hanga,”

Iwe wa nkhangwela mulandu wa vhutshinyi hanga.

₆Vhalanda vhau vha fulufhedzeaho vhoṱhe

nga vha rabele Iwe-ha u tshi kha ḓi wanala.

Muḓalo wa maḓi ó sinyuwa u tshi ḓa,

u nga si swike khavho.

₇Iwe u vhudzumbamo hanga;

u a ntsireledza ndi si welwe nga khombo.

Wo ntshidza,

ndo no tangwa nga mifhululu.

₈Litshani ndi ni laye,

ndi ni sumbedze nḓila ine na ḓo i fara,

ndi ni eletshedze ndi ni londote:

₉Ni songo nga bere,

ni songo ḓiita meila

ine ya langwa nga muhala na dziḓomo uri i ye hune wa funa.

₁₀Vhavhi vha welwa nga khombo nnzhi,

hone vha fulufhelaho Muṋe washu vha tsireledzwa

nga lufuno lu sa dzinginyei.

₁₁Inwi vha fulufhedzeaho,

pembelelani Muṋe washu,

inwi noṱhe vha si na vhufhura,

lidzani mifhululu.