Muṋe washu Musiki na Muvhusi
Thendo dzi tshi ya ha Muṋe washu
1Inwi vha fulufhedzeaho,
fhululedzani Muṋe washu!
Zwo naka hani vha mbilu dzo ṱambaho
vha tshi mu imbela!
2Rendani Muṋe washu nga haripa,
mu imbeleni nga haripa ya thale dza fumi!
3Mu imbeleni luimbo luswa,
ni lidze nga vhuṋambi ni tshi ṱavha mukosi no takala.
Maanḓa a ipfi ḽa Muṋe washu
4Ipfi ḽa Muṋe washu ḽi a fulufhedzea;
zwi vhonala nga zwoṱhe zwine a ita.
5U funa hu tshi itwa zwi re zwone na zwivhuya;
shango ḽo ḓala vhuthu ha Muṋe washu.
6Ḽiṱaḓulu ḽo sikwa nga ipfi ḽa Muṋe washu,
ṋaledzi dzaḽo dzoṱhe dzo sikwa nga mufemo wawe.
7O kuvhanganya maḓi a lwanzhe a nga e dzinkhoni;
mativha a a shatela zwisikuni.
8Ḽifhasi ḽoṱhe kha ḽi ofhe Muṋe washu,
vhathu vhoṱhe nga shango kha vha mu tetemele.
9O amba zwa vha hone,
a laela zwa ima zwo khwaṱha.
Nzudzanyo ya Muṋe washu i sa tseki
10Muṋe washu u piringanya vhutande ha dzitshakha,
u phusukanya vhukwila he vha dzudzanya.
11Nzudzanyo ya Muṋe washu a i tseki lini na lini,
mbofho dzawe dzi ya nga mirafho na mirafho.
12Lu na mashudu lushaka lune Mudzimu walwo
a vha Muṋe washu,
ndi vhathu vhe a vha nanga u vha vhawe vhukuma.
Muṋe washu Muvhonazwoṱhe
13Muṋe washu u lavhelesa fhasi e ṱaḓulu,
a vhona vhathu vhoṱhe;
14u vhusa o dzula kha khuluṋoni yawe
a tshi sedza vhathu vhoṱhe vha ḽifhasi.
15Ndi Ene Muvhumbi wa mbilu dzoṱhe;
u ṱalukanya zwoṱhe zwine vha ita.
16Khosi a i tshidzwi nga vhuhulu ha mmbi yayo,
na muhali ha tinyi nga maanḓa awe;
17bere ya nndwa a si yone i kundaho;
na maanḓa áyo a i koni u tshidza.
18Muṋe washu u londota vha mu ofhaho,
vhane vha fulufhela lufuno lwawe lu sa dzinginyei,
19uri a vha tshidze lufuni,
a ḓi vha fusha naho hu nḓalani.
Muṋe washu fulufhelo ḽashu
20Riṋe ri lindela Muṋe washu,
Mutiki washu na Tshiṱangu tshashu;
21mbilu dzashu dzi takalela Ene,
tshine ra fulufhela ndi dzina ḽawe ḽikhethwa.
22Muṋe washu, ngavhe u tshi ḓi ri funa nga lufuno lwau lu sa dzinginyei,
lwonolwo lwe ra lu fulufhela.
