DZIPHISALEMA 31

₁Muṋe washu, ndi khuda nga Iwe,

u songo vhuya wa tenda ndi tshi shoniswa;

hufha u tshi fulufhedzea, nndamulele!

₂Mpfe, u si lenge u nndamukisa!

Ivha bako ḽanga ḽine nda khuda khaḽo,

ivha nnḓu ine nda dzumbama khayo,

ndi hone ndi tshi ḓo tshila.

₃Ndi ngoho, u bako ḽanga,

u dzhavhelo ḽanga,

nnyendedze-ha u nndededze,

hufha u Mudzimu wanga.

₄Mponyokise mambuleni e vha nthetshela,

hufha u vhushavhelo hanga.

₅Ndo kumedza muya wanga zwanḓani zwau;

Muṋe washu, wo ntshidza,

Iwe Mudzimu a fulufhedzeaho.

₆Ndi vhenga vhane vha luvha midzimu i si tshithu,

hone nṋe ndi fulufhela Iwe Muṋe washu.

₇Wo vhona u tambula hanga

wa ḓivha vhuṱungu ha muya wanga;

ndi ḓo takala nda pembelela lufuno lwau

lu sa dzinginyei.

₈A wo ngo nkumedza zwanḓani zwa maswina,

wo mmbofholola, ndi vho kona u fema.

₉Muṋe washu, nkhathutshele,

ndo hanganea!

Maṱo anga o punda nga miṱodzi,

ndo kulekana miraḓo tshoṱhe,

₁₀vhutshilo hanga ho fheṱwa nga mbiluvhuṱungu,

vhutshilo hanga ho fhungudzwa nga u ḽa mbilu,

maanḓa anga o fhedzwa nga milandu yanga,

na marambo anga o ṋoka.

₁₁Maswina anga oṱhe a a nnyadza,

zwihulu vhahura vhanga;

khonani dzi vho nnyita dada;

vha ṱanganaho na nṋe nḓilani vha a shavha.

₁₂Ndo no tou hangwiwa sa o faho,

ndi vho nga mudzio wo pwasheaho;

₁₃maswina a ṱolou ntshushedza,

nyofho dzo tou ntanga nga hoṱhe;

ndi khou langanwa,

vha luka maano a u mmbulaha.

₁₄Hone nṋe ndi fulufhela Muṋe washu,

ndi ri, “U Mudzimu wanga.”

₁₅Zwine nda ṱangana nazwo ḓuvha ḽiṅwe na ḽiṅwe

zwi langwa nga Iwe;

nndamulele zwanḓani zwa maswina anga,

na zwanḓani zwa vhoṱhe vha ntovholaho.

₁₆Hufha ndi mulanda wau,

ntsedze nga vhuthu;

hufha lufuno lwau lu sa dzinginyei,

ntshidze!

₁₇Muṋe washu, ndo u vhidzelela,

u songo tenda ndi tshi shoniswa,

kha hu shoniswe vhavhi,

nga vha valwe milomo nga tshalo!

₁₈Milomo yavho kha i shatelwe,

i zwifhelela vha si na mulandu

nga u ḓihudza na luswetho na u sasaladza.

₁₉Vhuthu hau ho hula hani!

U dzula u tshi tonda vha u ofhaho na vhoṱhe vha khudaho nga Iwe,

uri vhathu vhoṱhe vha zwi vhone.

₂₀U vha dzumba tsini-tsini hau hu si na vhukwila ha vhathu,

wa vha vhea he vha tsireledzea, vha si tsha ḓo seṅwa.

₂₁Muṋe washu nga a rendwe;

o ntsumbedza lufuno lu kanukisaho zwiḽa ndo tingwa

unga muḓi wó govhelwa.

₂₂Ndo vha ndo tshenuwa nda ri,

“Ndo fhandekanywa na Iwe,

ndo lovha!”

Hone Iwe wo pfa mukosi wanga wa nndamulela.

₂₃Funani Muṋe washu noṱhe inwi

vhalanda vhawe vha fulufhedzeaho!

Muṋe washu u vhulunga vha na ngoho,

ngeno vha u ḓihudza a tshi vha lifhedza zwihulu.

₂₄Imani no khwaṱha ni sa neti noṱhe inwi

ni fulufhelaho Muṋe washu.