DZIPHISALEMA 30

₁Muṋe washu, ndi a u renda;

wo nṋula khomboni,

wa si tende maswina anga a tshi ḓiphiṋa nga nṋe.

₂Mudzimu Muṋe wanga,

ndo u ṱavhela mukosi

wa mphodza.

₃Muṋe washu,

wo nṋula vhudzulavhafu;

ndo vha ndo fara i yaho tshaloni,

wa dovha wa nṋea vhutshilo.

₄Inwi vhalanda vha Muṋe washu vha fulufhedzeaho,

mu rendeni nga nyimbo;

mu livhuheni,

ni elelwe vhukhethwa hawe.

₅Mbiti dzawe a dzi kovhedzi ḓuvha,

vhuthu hawe hone a vhu gumi.

Ḽi tshi kovhela hu rothiswa miṱodzi,

ḽi tshi tsha ha lila mifhululu.

₆Zwiḽa zwi tshi nnyanḓa ndo ri,

“Ndi ḓo ima ndo khwaṱha lini na lini.”

₇Muṋe washu, wo vha wo nkhwaṱhisa nga vhuthu hau

nda nga thavha i sa tseki;

hone u tshi vho mpfuralela zwa nkula nungo.

₈Muṋe washu, ndo u ṱavhela mukosi,

nda ri, “Muṋe wanga, nkhathutshele!

₉Ndá fa zwi ḓo u farisani?

U ḓo vhuelwa ngani ndi tshi swiṱwa?

U ḓo rendwa nga buse naa?

Luruli lu nga ṱanziela u fulufhedzea hau naa?

₁₀Muṋe washu,

nthetshelese u nkhathutshele!

Muṋe washu, nndamulele!”

₁₁Tshililo tshanga wo tshi shandula dakalo;

wo mmvula madzanganda a zwililo wa nnyambadza dakalo.

₁₂Zwino a thi tsha ḓo fhumula,

ndi ḓo u renda nga nyimbo.

Mudzimu Muṋe wanga,

ndi ḓo u livhuha lini na lini.