Muṋe wa maḓumbu
Phisalema ya Dafita.
Thendo ṱaḓulu
1Rendani Muṋe washu,
hee inwi vhahulwane vha re ṱaḓulu,
rendani Muṋe washu wa vhugala na maanḓa!
2Rendani dzina ḽa Muṋe washu ḽa vhugala,
luvhani Muṋe washu a tshi vhonadza lupenyo lwawe lukhethwa.
Muṋe washu a tshi amba e kha ḓumbu
3Ipfi ḽa Muṋe washu ḽi pfala lwanzheni,
Mudzimu wa vhugala u a bvuma e ngindii,
Muṋe washu u dzula nṱha ha maḓi mahulu.
4Ipfi ḽa Muṋe washu ḽi na maanḓa,
ipfi ḽa Muṋe washu ḽi na vhugala.
5Ipfi ḽa Muṋe washu ḽi fhandula mikedara,
Muṋe washu u fhandula mikedara ya Libanoni.
6U ritha Thavha ya Libanoni ya khana sa ṋamana,
Thavha ya Heremoni ya fhufha sa ṋari.
7Ipfi ḽa Muṋe washu ḽá pfala hu vhenge ha bva khavhu.
8Ipfi ḽa Muṋe washu ḽi dzinginyisa masoga,
Muṋe washu u dzinginyisa phanga dza Kadeshe.
9Ipfi ḽa Muṋe washu ḽá pfala tholo dzi a dzwala,
ḽi ṱangula maṱaka ha sala he swoto,
hone thembeleni yawe ha pfala mifhululu vha ri, “Thendo!”
Mashudu a vhathu vha Mudzimu
10Muṋe washu u vhusa ó thukha kha mativha mahulu,
Muṋe washu u ḓo ḓi vhusa e khosi lini na lini.
11Muṋe washu u ḓo ṋea vhathu vhawe nungo,
Muṋe washu u ḓo shudufhadza lushaka lwawe ḽa lala.
