DZIPHISALEMA 28

₁Muṋe washu, ndi vhidzelela Iwe,

u songo mpfuralela,

Iwe bako ḽine nda khuda khaḽo,

u sa ḓo ri wo mphumulela nda ḓo nga

vhane vha godimela tshaloni.

₂Thetshelesa ndi tshi u luvhelela,

ndi tshi u ṱavhela mukosi

ndó imisela zwanḓa nṱha zwó livha pfamoni yau khethwa.

₃U songo nndaṱa na vhavhi vha lukaho vhutshinyi,

vhane nga mulomo vha bula mavhuya ngeno mbilu dzo ḓala vhumbulu.

₄Vha lifhedze zwe vha ita u tshi tevhedza vhuvhi havho,

vha lifhedze mishumo ya zwanḓa zwavho,

u vha ṋee pfufho yo vha teaho.

₅Hufha vha sa londi mishumo ya Muṋe washu

kana zwe zwanḓa zwawe zwa shuma;

ú ḓo vha khurumedza vha wa,

a si tsha vha fhaṱa.

₆Muṋe washu nga a rendwe;

o pfa mukosi wanga.

₇Muṋe washu ndi Ene nungo dzanga,

ndi tshiṱangu tshanga;

mbilu yanga i fulufhela Ene;

u a mphalala nda takala,

nda mu livhuha nga luimbo.

₈Muṋe washu ndi Ene nungo dza vhathu vhawe,

ndi Ene dzhavhelo ḽo khudaho ḽa khosi ye a i ta.

₉Tshidza lushaka lwau,

u shudufhadze vha re vhau,

vha lise u vha tike lini na lini.