DZIPHISALEMA 27

₁Muṋe washu ndi tshedza tshanga,

Mutshidzi wanga ndi Ene,

ndi kha ḓi ofha nnyi?

Muṋe washu ndi dzhavhelo ḽanga,

ndi kha ḓi tshenuwa nnyi?

₂Maswina anga na vhavhi vha lwaho na nṋe

vha tshi nndodela vha tshi ri vha mponde,

vha ḓo khukhulwa vha wa.

₃Naho gomane ya ntinga mbilu yanga a i nga ofhi,

naho nda diwa nga mmbi ndi ḓo fulufhela ndo khwaṱha.

₄Ndi tshithihi fhedzi tshine nda humbela Muṋe washu;

tshine nda lila ndi tshithihi fhedzi:

ndi u dzula pfamoni ya Muṋe washu

maḓuvha oṱhe a vhutshilo hanga,

ndi tshi takadzwa nga Muṋe washu

ndi tshi mu elekanya thembeleni yawe.

₅U ḓo ntsireledza musi muvhi,

a nnzumba pfamoni yawe,

a nnyimisa nṱha ha tombo.

₆Ndi hone ndi tshi ḓo imisa ṱhoho

nda vhona maswina anga o ntingaho e fhasi-fhasi,

nda konou ṋekedza zwiṱhavhelo pfamoni yawe

ho ṱangana mifhululu ya dakalo;

ndi ḓo imba nda renda Muṋe washu.

₇Muṋe washu, ipfa ndi tshi u vhidzelela!

Nkhathutshele u mphindule!

₈Ndi elelwa zwe wa nndaya u tshi ri,

“Iḓa u nnduvhe.”

Ndi zwone: ndi ḓo ḓa nda luvha Muṋe washu,

₉u songo nnzumbama,

u songo ntsinyutshela wa nkhumisa;

hufha wo ḓi vha Mulamuleli wanga;

Mudzimu Mutshidzi wanga,

u songo nṱamba, u songo nndaṱa.

₁₀Naho khotsi anga na mme anga vha nga nndaṱa,

Iwe Muṋe washu u ḓo nkuvhatedza.

₁₁Muṋe washu, mpfunze nḓila dzau,

u ntshimbidze nga nḓila-nḓila;

ndi na maswina.

₁₂U songo nkumedza one;

ṱhanzi dza u zwifha dzo mmvutshela,

vha amba a u nkhuvhadza.

₁₃Ngavhe ndi si fulufhele uri ndi ḓo vhona vhuthu ha Muṋe washu ndi tshi kha ḓi tshila ...

a thi tsha ḓivha!

₁₄Lindela Muṋe washu,

ima u khwaṱhe, u songo kulea nungo,

lindela Muṋe washu!