DZIPHISALEMA 18

₁Ndi u funa hani Muṋe washu,

maanḓa anga ndi Iwe.

₂Muṋe washu ndi vhukhudo hanga,

ndi dzhavhelo ḽanga,

ndi Mutshidzi wanga, Mudzimu wanga,

bako ḽanga, Ene ane nda khuda ngae,

ndi Ene tshiṱangu tshanga,

pfumo ḽi nndwelaho,

hone vhushavhelo hanga luwani.

₃Muṋe washu ndi ḓi mu vhidzelela ndó welwa nga maswina,

a ntshidza, nga hu khoḓwe Ene.

₄Ndo vha ndo tandedzwa nga mambule a lufu,

ndó khakhedzwa nga tshirulu tsha ndozwo.

₅Ndo vha ndo tandedzwa nga mambule a vhudzulavhafu,

ndó livhana na milavhu ya lufu,

₆nda ḓi vhidzelela Muṋe washu ndo khakhedzwa,

Mudzimu wanga nda mu ṱavhela mukosi,

Ene a pfa ipfi ḽanga e pfamoni yawe,

mukosi wanga wa swika nḓevheni dzawe.

₇Zwenezwo shango ḽa dzinginyea ḽa tetemela,

miteo ya dzithavha ya tseka-tseka,

ya dzinginyea ó sinyuwa;

₈ningoni dzawe ha duba vhutsi,

mulomoni ha bva khavhu dza vhuhali,

a pfela masimbe a mulilo fhasi;

₉lutombo a lu peta a tsela fhasi,

swiswi ḽitswu-ḽitswu ḽí fhasi ha ṋayo dzawe;

₁₀a fhufha ó namela mukherube,

a tengama nga phapha dza muya,

₁₁a dzhia swiswi a fuka ḽone,

thumba yawe e makole matswu a mvula,

₁₂phanḓa hawe he vhenge,

makole awe a shulula tshifhango na masimbe,

₁₃Muṋe washu a ritha mubvumo ṱaḓulu he ngindii,

Waṱaḓuluṱaḓulu a mbo ṱahisa ipfi ḽawe

ha shuluwa tshifhango na masimbe a mulilo,

₁₄a posa misevhe yawe a vha balanganya,

a thathabisa nḓadzi dzawe vha shavha vhó ḓaḓa.

₁₅Zwenezwo miedzi ya lwanzhe ya sala nnḓa

miteo ya ḽifhasi ya sala khagala u tshi vha kaidza Iwe Muṋe washu,

hu tshi tita muya u bvaho ningoni dzau.

₁₆Muṋe washu a onyolosa tshanḓa e ngei ṱaḓulu,

a ntakula a nṋula mikumbelani,

₁₇a nndamukisa zwanḓani zwa swina ḽanga ḽa maanḓa

na vha mmbengaho,

ngauri nṋe ndo vha ndi nga si vha kone.

₁₈Vho nnzhongondedza ndó welwa nga zwo vhifhaho,

hone nda tou fa Muṋe washu,

₁₉Ene a nṋula vhukati havho.

O ntshidza ngauri u a mpfuna.

₂₀Muṋe washu o mpfufha

nga zwo fanelaho a no fulufhedzea,

a nṋea zwo fanelaho a si na mulandu,

₂₁ngauri ndo tevhedza nḓila dza Muṋe washu,

a tho ngo tenda vhuvhi vhu tshi mphandekanya

na Mudzimu wanga.

₂₂Milayo yawe yoṱhe a i ṱuwi mbiluni yanga,

zwe a laya a tho ngo zwi sendedza kule;

₂₃Ene muṋe o vhona ndi sa solisei,

tshanga ho ḓi vha u ofha u khakha.

₂₄Ndi zwe Muṋe washu a mpfufha

nga zwo fanelaho a no fulufhedzea,

nge a vhona ndi si na mulandu.

₂₅Vha vhuthu Iwe u ḓi vha itela-vho vhuthu;

a sa solisei u mu pfufha nga zwi sa solisei;

₂₆vha mbilu dzo ṱambaho

vha wana na Iwe u na mbilu tshena,

hone vhadziavhumbulu vha wana u swina.

₂₇Iwe u tshidza vha ḓiṱukufhadzaho,

wa ṱukufhadza vha u ḓihudza.

₂₈Muṋe washu,

ndi Iwe une wa ntshidza,

zwa nga wo mpfungela luvhone wa pandela swiswi ḽo ntibaho,

Iwe Mudzimu wanga.

₂₉Ndí na Iwe ndi wela mmbi nga pfumo,

ndí na Mudzimu wanga ndi fhufha mitsheṱo.

₃₀Ndi Ene Mudzimu a sa khakhi,

ḽine a amba ḽi ḓi wanala ḽi ngoho.

Ndi Ene tshiṱangu

tsha vhoṱhe vhane vha khuda ngae.

₃₁Nṋa hone Mudzimu ndi nnyi arali e si Ene Muṋe washu?

Bako ḽa vhudzumbamo hashu ndi nnyi

arali e si Mudzimu washu?

₃₂Ndi Ene Mudzimu we a nnyambadza nungo,

nda tshimbila ndi sa khukhulwi.

₃₃U mpha luvhilo lwa phala,

na nṱha ha thavha a thi khukhulwi.

₃₄Zwanḓa zwanga u zwi gudisa nndwa,

zwa khwaṱha nda akha vhura ha tsimbi tswuku.

₃₅U tshidzwa nga Iwe ndi tshone tshiṱangu tshanga,

u ntika nga tshanḓa tshau tsha maanḓa,

wo nṋea vhuhulwane nga vhuthu hau.

₃₆Ṋayo dzanga wo dzi ṋea vhukando,

nda sa redzemuwe.

₃₇Maswina anga ndo a pandamedza nda a fara,

nda sa vha humele vha sa athu fhela vhoṱhe.

₃₈Ndo vha sukekanya vha si tsha vuwa,

nda vha kandekanya nga ṋayo dzanga.

₃₉Wo mpha maanḓa a u dzhena nndwa,

maswina anga wa a susumedza nga fhasi ha ṋayo dzanga.

₄₀Wo ita uri maswina anga a mphe zwitiko,

nda fhedza vhoṱhe vhe vha vha vha tshi mmbenga.

₄₁Vho ṱavha mukosi vha shaya mulamuleli,

vha vhidzelela Muṋe washu a si vha aravhe,

₄₂nda vha phusukanya sa buse ḽi hwalwaho nga ḓumbu,

nda vha kudza nnḓa vha nga lurofhe nḓilani.

₄₃Iwe wo nndamukisa vhathu vha tshi mmvutshela,

wa mmbumba yone ṱhoho ya dzitshakha,

nda luvhiwa na nga vhane ndi si vha ḓivhe.

₄₄Vho ri u pfa bvumo ḽanga vha mbo ḓi ḓa vha luvha,

vhatsinda vha ḓa vha khotha,

₄₅vha kulea miraḓo,

vha bva mitsheṱoni yavho vha tshi tou khura nga nyofho.

₄₆Muṋe washu u a tshila!

Kha hu rendwe Ene bako ḽanga ḽa u khuda,

nga hu huliswe Ene Mudzimu a ntshidzaho,

₄₇Ene we a mpha maanḓa a u ḓilifhedzela,

dzitshakha a dzi ita vhalanda vhanga,

₄₈a nndamukisa zwanḓani zwa vha mmbengaho.

Ee, ndi Iwe we wa nṋea vhuhulwane nda fhira maswina anga,

vhalevhi vha tshi mmvutshela wa ntshidza.

₄₉Muṋe washu,

ndi zwine nda ḓo u renda vhukati ha dzitshakha,

ndi ḓo renda dzina ḽau nga luimbo.

₅₀Khosi ye wa i ta wa i sumbedza lufuno lu sa dzinginyei,

ya kunda maswina tshoṱhe –

ene Dafita na vhaḓuhulu vhawe,

zwino na lini na lini.