DZIPHISALEMA 12

₁Muṋe washu, ntshidze,

a hu tshee na vhathu-vhathu fhano shangoni,

u tshi sedza vhathu,

a fulufhedzeaho ha sokou wanala.

₂Ho sala u sokou zwifhelana nga tshavho.

Vha tshi amba vha tou swaledzela, ngeno mbiluni zwi siho.

₃Hone milomo yoṱhe ya u swaledzela

Muṋe washu u ḓo ita uri i fhumule;

na kha lulimi lwa mazuwo zwi ḓo ralo.

₄Vha tshi zuwa vha ri,

“Ri ḓo kunda nga lulimi lwashu;

milomo hufha i yashu –

a ri vhusaho ndi nnyi?”

₅Zwino-ha Muṋe washu u ri,

“Uvhani ndi a takutshedza

nga u vhona u kandeledzwa ha vhaheḓana

na u pfa zwigomelo zwa vhashai;

vho lavhelelaho u lamulelwa vhó fhihamelwa

ndi ḓo vha lamulela.”

₆Maipfi a Muṋe washu ndi maipfi vhukuma,

a nga siliva ye ya bviswa manyelo ṋanḓoni kaṱanu na kavhili.

₇Iwe Muṋe washu u ḓo vha londola lini na lini,

havha vhathu vha tshi vha levhela

u ḓo vha tsireledza,

₈naho vhathu vhavhi vha tshi tou gaba,

vhunwa hó ḓibandutshedza vhathuni.