LIVITIKO 2

₁“Musi muthu a tshi ṋekedza Yahavee nduvho ya thoro, nga a thome a i kuye i vhe vhukhopfu. Nga a i vange mapfura a muolivi a ṋuṋedze zwioro, ₂a i ḓise ha vhotshifhe vhana vha Aroni. Tshifhe u ḓo ṱusa vhukhopfu uho vhutete na mapfura nga tshanḓa, khathihi na zwioro zwoṱhe, a zwi fhisa nṱha ha aḽiṱari zwa vha tshiga tsha uri zwoṱhe zwo ṋekedzwa Yahavee. Iyo nduvho ya zwiḽiwa i nukhelelaho u ḓifha i takadza Yahavee. ₃Tshipiḓa tsho salaho tsha nduvho ya thoro ndi tsha Aroni na vhana vhawe, ndi khethwa-khethwa, ngauri i bva kha zwiḽiwa zwo kumedzwaho Yahavee. ₄Arali nduvho i ya vhurotho ho bagiwaho ṋanḓoni, ho fanela u bagiwa vhu si na mbilisa. Vhu nga kha ḓi vha ha mikonde midenya ho bagiwaho nga vhukhopfu ho vangiwaho mapfura a muolivi kana makokisi o ḓodzwaho mapfura a muolivi. ₅Arali iyo nduvho i ya vhurotho ho bagwaho nga ludongo, nga vhu itwe nga vhukhopfu ho vangiwaho mapfura a muolivi, hone vhu si na mbilisa. ₆Vhu ṅwatekanye vhu ite zwigaku, u vhu shele mapfura musi u tshi vhu ṋekedza uri vhu vhe nduvho. ₇Arali iyo nduvho i ya vhurotho ho bagiwaho nga pani, nga vhu bagiwe nga vhukhopfu na mapfura a muolivi.

₈“I ḓise ha Yahavee i vhe nduvho, u swikise ha tshifhe, ene u ḓo i isa aḽiṱarini. ₉Tshifhe u ḓo ṱusa tshipiḓa tshayo uri tshi vhe tshiga tsha uri zwoṱhe zwo ṋekedzwa Yahavee, a i fhisa nṱha ha aḽiṱari. Iyo nduvho ya zwiḽiwa zwi nukhelelaho i takadza Yahavee. ₁₀Nduvho yo salaho ndi ya Aroni na vhana vhawe; ndi khethwa-khethwa, ngauri i bva kha zwiḽiwa zwo ṋekedzwaho Yahavee.

₁₁“Nduvho ya thoro ine na i ṋekedza Yahavee i songo vha i na mbilisa; zwiḽiwa zwine na zwi fhisela Yahavee zwi songo vha zwi na mbilisa kana ṋotshi. ₁₂Nduvho ya zwa u ranga zwe na kaṋa masimuni ṅwaha muṅwe na muṅwe i ḓiswe ha Yahavee, hone i songo fhiswa kha aḽiṱari. ₁₃Nduvho ya thoro iṅwe na iṅwe i lungwe muṋo, ngauri muṋo u ni humbudza mulanga we na vhofha na Mudzimu. Nduvho dzaṋu dzoṱhe ni dzi lunge muṋo.

₁₄“Musi ni tshi ḓisela Yahavee nduvho ya zwa u ranga zwe na kaṋa masimuni, mu ṋekedzeni thoro dzo hadzingwaho kana vhurotho ho bagiwaho nga zwo kaṋiwaho masimuni. ₁₅Zwi vangeni na mapfura a muolivi ni ṋuṋedze zwioro. Ndi nduvho ya thoro. ₁₆Tshifhe u ḓo fhisa tshipiḓa itsho tshine tsha vha tshiga tsha vhurotho na mapfura, khathihi na zwioro zwoṱhe, zwa vha nduvho ya zwiḽiwa i ṋekedzwaho Yahavee.