LIVITIKO 1

₁Muṋe washu o vhidza Mushe e denndeni ya u ṱangana na Mudzimu a mu ṋea ndaela hedzino, ₂a ri Vhaisraele vha dzi tevhedzele musi vha tshi ṋekedza nduvho dzavho. A ri,

“Arali muthu a tshi ṋekedza tshiṱhavhelo tsha tshifuwo, i nga vha kholomo kana nngu kana mbudzi. ₃Arali a tshi ṋekedza iṅwe ya kholomo dzawe ya vha tshiṱhavhelo tshi fhiswaho, o fanela u ḓisa mboho i si na badzi. Nga a i swikise muṋangoni wa dennde ya u ṱangana na Mudzimu uri Yahavee a kone u mu ṱanganedza. ₄Uyo munna nga a vhee tshanḓa tshawe nṱha ha ṱhoho yayo, ndi hone i tshi ḓo ṱanganedzwa ya vha tshiṱhavhelo tsha u mu pfumelela. ₅Nga a mbo ḓi ṱhavha iyo mboho henefho, vhotshifhe vhana vha Aroni vha ḓo swikisa malofha ha Yahavee, vha handulula masia maṋa a aḽiṱari ine ya vha muṋangoni wa dennde ya u ṱangana na Mudzimu. ₆Ndi hone a tshi ḓo kona u via itsho tshifuwo a tshi tumukanya, ₇vhotshifhe vhana vha Aroni vha vhekanya khuni nṱha ha aḽiṱari vha honza mulilo. ₈Vhotshifhe vhana vha Aroni vha vhee miraḓo ya tshifuwo nṱha ha khuni muliloni wa aḽiṱari, khathihi na ṱhoho na mapfura. ₉Uyo munna a ṱanzwe miraḓo ya nga ngomu na milenzhe ya murahu nga maḓi, tshifhe a fhise tshiṱhavhelo itsho tshoṱhe nṱha ha aḽiṱari. Iyo nduvho ya zwiḽiwa i nukhelelaho i takadza Yahavee.

₁₀“Arali uyo munna a tshi ṋekedza nngu kana mbudzi, yo fanela u vha ya nduna i si na badzi. ₁₁Nga a i ṱhavhe sia ḽa devhula ḽa aḽiṱari, phanḓa ha Yahavee, vhotshifhe vhana vha Aroni vha handulule masia maṋa oṱhe a aḽiṱari nga malofha ayo. ₁₂Uyo munna nga a i tumukanye, vhotshifhe vha vhee iyo miraḓo ya tshifuwo nṱha ha khuni muliloni wa aḽiṱari, khathihi na ṱhoho na mapfura. ₁₃A ṱanzwe miraḓo ya nga ngomu na milenzhe ya murahu nga maḓi, tshifhe a swikise itsho tshiṱhavhelo ha Yahavee a fhise tshiṱhavhelo itsho tshoṱhe nṱha ha aḽiṱari. Iyo nduvho ya zwiḽiwa i nukhelelaho i takadza Yahavee.

₁₄“Arali uyo munna a tshi ṋekedza tshiṋoni tshi tshi vha nduvho i fhiswaho, tsho fanela u vha tshiivhamuronzhe kana ḽiivha. ₁₅Tshifhe u ḓo ḽi ṋekedza aḽiṱarini, a ḽi ṱhukhula mutsinga, a fhisa ṱhoho yaḽo nṱha ha aḽiṱari. Malofha aḽo a shashiwe nga matungo a aḽiṱari. ₁₆Tshifhe a bvise dyelo na thoro, a ṱhuvhe mithenga a zwi laṱe sia ḽa vhubvaḓuvha ḽa aḽiṱari hune ha shelwa milora. ₁₇A fare phapha dzaḽo a fhandule mutumbu waḽo, a si vhuye a fhafhula phapha dzaḽo, a ḽi fhise ḽoṱhe nṱha ha aḽiṱari. Iyo nduvho ya zwiḽiwa i nukhelelaho i takadza Yahavee.