LIVITIKO 3

₁“Musi muthu a tshi ṋekedza Yahavee kholomo yawe uri i vhe nduvho ya u konana nae, nga i vhe mboho kana ya tsadzi i si na badzi. ₂Uyo munna nga a vhee tshanḓa tshawe kha ṱhoho ya itsho tshifuwo, a tshi ṱhavhe muṋangoni wa dennde ya u ṱangana na Mudzimu. Vhotshifhe vhana vha Aroni vha ḓo handulula masia oṱhe maṋa a aḽiṱari nga malofha ayo, ₃vha ṋekedza Muṋe washu miraḓo hei ya tshifuwo ya vha nduvho ya zwiḽiwa: lupila lwoṱhe lwa mapfura o pilaho miraḓo ya nga ngomu, ₄tswio na mapfura a re khadzo, na phudwane ya tshivhindi. ₅Vhotshifhe vha ḓo fhisa zwoṱhe hezwo kha aḽiṱari nṱha ha khuni khathihi na zwiṱhavhelo zwi fhiswaho. Nduvho heyo ya zwiḽiwa i nukhelelaho i takadza Yahavee.

₆“Arali nduvho ya vhukonani ine a ṋekedza Yahavee i nngu i nga vha i nduna kana tsadzi, hone i vhe i si na badzi. ₇Arali munna a tshi ṋekedza nngu, ₈nga a vhee tshanḓa tshawe kha ṱhoho yayo, a i ṱhavhe muṋangoni wa dennde ya u ṱangana na Mudzimu. Vhotshifhe nga vha handulule masia oṱhe maṋa a aḽiṱari nga malofha ayo, ₉vha ṋekedze Yahavee miraḓo heino ya itsho tshifuwo i vhe nduvho ya u konana nae: mapfura, mutshila woṱhe wa mapfura wó tumulwa tsini na shambo ḽa muṱoḓo, lupila lwoṱhe lwa mapfura o pilaho miraḓo ya nga ngomu, ₁₀tswio na mapfura a re khadzo na phudwane ya tshivhindi. ₁₁Tshifhe nga a fhise zwithu izwo zwoṱhe kha aḽiṱari zwi vhe nduvho ya zwiḽiwa ine ya ṋekedzwa Yahavee.

₁₂“Arali muthu a tshi ṋekedza mbudzi, ₁₃nga a vhee tshanḓa tshawe kha ṱhoho yayo, a i ṱhavhe muṋangoni wa dennde ya u ṱangana na Mudzimu. Vhotshifhe nga vha handulule masia oṱhe maṋa a aḽiṱari nga malofha ayo, ₁₄vha ṋekedze Yahavee miraḓo heino i vhe nduvho ya zwiḽiwa: mapfura oṱhe a pilaho miraḓo ya nga ngomu na a nambatelaho khayo: ₁₅tswio na mapfura a re khadzo na phudwane ya tshivhindi. ₁₆Tshifhe nga a fhise zwoṱhe hezwo kha aḽiṱari zwi vhe nduvho ya zwiḽiwa i takadzaho Yahavee. Mapfura oṱhe ndi a Yahavee. ₁₇Hu songo vha na Muisraele ane a ḽa mapfura kana malofha ayo; hoyu ndi mulayo une wa fanela u vhulungwa lini na lini nga Vhaisraele vha mirafho yoṱhe hoṱhe hune vha dzula hone.”