EKISODA 40

₁Muṋe washu a vhudza Mushe a ri, ₂“Nga ḓuvha ḽa u ranga ḽa ṅwedzi wa u ranga u imise dennde ya u ṱangana na Nṋe. ₃Ngomu hayo u longe mbulungelo i re na Milayo ya fumi, u nembeledze pesa ḽa lupila phanḓa hayo. ₄U dzhenise ḓafula u vhee thundu dzaḽo nṱha haḽo. U dzhenise na tshivheambone, nṱha hatsho u vhee mbone. ₅Phanḓa ha mbulungelo u vhee aḽiṱari ya musuku ya u fhisela zwioro, u nembeledze pesa ḽa lupila muṋangoni wa dennde. ₆Phanḓa ha dennde u vhee aḽiṱari ya u fhisela zwiṱhavhelo. ₇U vhee sambelo vhukati ha dennde na aḽiṱari u ḽi ḓadze maḓi. ₈U ite muṱa u mona na dennde, u nembeledze pesa ḽa lupila muṋangoni wa muṱa.

₉“Wo no fhedza u nkumedze iyo dennde na thundu yayo yoṱhe nga u i shela mapfura makhethwa, ndi hone i tshi ḓo vha khethwa. ₁₀Wo no fhedza izwo u nkumedze aḽiṱari na thundu yayo yoṱhe nga u i shela mapfura, ndi hone i tshi ḓo vha khethwa tshoṱhe. ₁₁U nkumedze na sambelo na tshiraho tshaḽo nga u ralo.

₁₂“U ḓise Aroni na vhana vhawe muṋangoni wa dennde ya u ṱangana na Nṋe, u vha vhudze vha ṱambe. ₁₃U ambadze Aroni zwiambaro zwikhethwa, u mu ḓodze mapfura, u nkumedze ene, uri a ntshumele e tshifhe. ₁₄U ḓise vhana vhawe u vha ambadze dzihemmbe. ₁₅Wo no ralo u kone u vha ḓodza mapfura, zwi nge u tshi ḓodza khotsi avho mapfura, uri vha ntshumele vhe vhotshifhe. U ḓodzwa mapfura uho hu ḓo vha ita vhotshifhe, vhone na vhana vhavho vha vha vhotshifhe lini na lini.”

₁₆Mushe a ita zwoṱhe nga he Muṋe washu a mu laya; ho ngo siedza na tshithihi. ₁₇Nga ḓuvha ḽa u ranga ḽa ṅwedzi wa u ranga wa ṅwaha wa vhuvhili tshee vha pfuluwa Egipita, dennde ya u ṱangana na Mudzimu ya imiswa. ₁₈Mushe a longa zwiraho zwayo vhudzuloni hazwo, a imisa thikho dzayo, a longa mbalelo dza u rambalala dza tsimbi, a imisa phuphu dzayo. ₁₉Mushe a fulela iyo dennde, nṱha a fukedza lupila lwa nnḓa, nga he Muṋe washu a mu laya. ₂₀Ndi hone a tshi dzhia aḽa maḓaba mavhili a milayo a dzi longa ngomu ha mbulungelo. A longa thanda kha mikungelo ya mbulungelo, a i tiba nga tshitibo. ₂₁Ndi hone a tshi longa mbulungelo ngomu ha dennde, a nembeledza pesa ḽa lupila. U ralo ha vha u pila mbulungelo, nga he Muṋe washu a mu laya.

₂₂Mushe a longa ḓafula denndeni ya u ṱangana na Mudzimu, thungo ya devhula nnḓa ha pesa ḽa lupila, ₂₃nṱha haḽo a vhea vhurotho vhune ha ṋekedzwa Muṋe washu, nga he Muṋe washu a mu laya. ₂₄A vhea tshivheambone ngomu denndeni ya u ṱangana na Mudzimu, thungo ya tshipembe, u livhana na ḓafula. ₂₅Henefho phanḓa ha Muṋe washu a funga mbone, nga he Muṋe washu a mu laya. ₂₆A vhea aḽiṱari ya musuku ngomu ha dennde ya u ṱangana na Mudzimu, phanḓa ha pesa ḽa lupila, ₂₇a fhisa zwioro, nga he Muṋe washu a mu laya. ₂₈A nembeledza pesa ḽa lupila muṋangoni wa dennde, ₂₉henefho phanḓa ha pesa ḽa lupila a vhea aḽiṱari ya u fhisela zwiṱhavhelo. Henefho nṱha hayo a ṋekedza tshiṱhavhelo tshi fhiswaho na nduvho ya thoro, nga he Muṋe washu a mu laya. ₃₀A vhea sambelo vhukati ha dennde ya u ṱangana na Mudzimu na aḽiṱari, a ḽi ḓadza maḓi a u ṱamba. ₃₁Mushe na Aroni na vhana vhawe vha ḓi ṱamba zwanḓa na milenzhe henefho, ₃₂misi yoṱhe vha tshi dzhena denndeni ya u ṱangana na Mudzimu kana vha tshi ya aḽiṱarini, nga he Muṋe washu a laya. ₃₃Mushe a ita muṱa wa u tanga dennde na aḽiṱari, a nembeledza pesa ḽa lupila muṋangoni wa muṱa. Mushe a vha o khunyeledza mushumo woṱhe.

₃₄Ndi hone hu tshi ḓa gole ḽa tiba dennde ya u ṱangana na Mudzimu, ya ḓala lupenyo lwa Muṋe washu. ₃₅Mushe a kundwa u dzhena denndeni ya u ṱangana na Mudzimu nge gole ḽa vha ḽi nṱha hayo na nge ya vha yo ḓala lupenyo lwa Muṋe washu.

₃₆Hoṱhe he Vhaisraele vha vha vho fara lwendo, musi gole ḽi tshi takuwa nṱha ha dennde, na vhone vho vha vha tshi takuwa vha tshimbila. ₃₇Arali gole ḽi songo takuwa vho vha vha tshi lindela, vha si tshimbile ḽa vhuya ḽa takuwa. ₃₈Ndi uri gole ḽa Muṋe washu ḽo vha ḽi tshi vhonala ḽi nṱha ha dennde masiari, vhusiku hu tshi penya mulilo ngomu ha gole, Vhaisraele vhoṱhe vha tshi zwi vhona hoṱhe he vha tshimbila.