JOBO 41

₁U songo vhuya wa fulufhela uri u nga i kona;

u tou i vhona fhedzi zwi kula nungo.

₂A hu na muthu a re na tshiṱuhu tsha u thoma itsho tshivhumbwa tshanga,

zwino ane a nga imedzana na Nṋe ndi nnyi?

₃Ndi nnyi ane a ri ndo ḽa mulandu wawe?

Hufha zwoṱhe zwi re fhasi ha lutombo

zwi zwanga.

₄A thi nga litshi u amba miraḓo ya ngweṋa,

na nungo dzayo,

na u naka ha tshivhumbeo tshayo:

₅Ane a nga i sutula mukumba ndi nnyi?

Ndi nnyi ane a nga i longa ḓomo?

₆Mulomo wayo wo ḓala maṋo a ofhisaho;

ndi nnyi ane a nga u ganulula?

₇Muṱana wayo wo phapha ngwasa

dza makwanda a no nga zwiṱangu,

zwo tou lukekana zwoṱhe,

₈makwanda a ṱumana lune muya wa si dzhene;

₉o nambatelana a tou kwakwana,

ha fhandekanywi nga tshithu.

₁₀I tshi atsamula hu fhufha ṱhase;

maṱo ayo o tswuka unga mapfuvhi;

₁₁mulomoni wayo hu duga khavhu dza mulilo,

ha thamuwa ṱhase;

₁₂ningoni dzayo hu duba vhutsi,

zwa nga hu khou vhila khali

i no vhasedzwa nga ṱhanga;

₁₃i tshi fema hu bva masimbe,

ha duga khavhu mulomoni wayo.

₁₄Nungo dzayo dzi mutsingani;

vhoṱhe vha a i ofha vha tou tetemela;

₁₅ṋama dzayo dzo tou vhofhekana;

dzo tou te, a dzi sudzuluwi;

₁₆khana yayo yo khwaṱha unga tombo,

i nga lwala.

₁₇Ya vuwa, vha maanḓa na vhone vha a ofha;

ya ritha maḓi vha huma nga tsha murahu.

₁₈Pfumo ḽa poswa ḽi nga itani?

Hu banga, hu tsanga, hu musevhe,

a zwi i iti tshithu.

₁₉I vunḓa tsimbi unga ṱanga,

musinaseṱha i vhona ḽi vongori;

₂₀i tshi vhona musevhe a i shavhi,

matombo a gatho ya vhona e mathukhwi;

₂₁mugopi i vhona u tshi nga ṱanga;

vhathu vha tshi posa mafumo, i a sea;

₂₂makwanda a re thumbuni yayo a nga zwipali zwa khali,

a sia mutalo matopeni unga tshilei;

₂₃i selusa mativha unga khali i tshi vhila,

a nga khali ya mapfura i tshi xaxara;

₂₄ya tala, i sia mutalo u penyaho,

wa vhona unga mativha a na mmvi.

₂₅A hu na tshi no vhambedzwa nayo fhano fhasi;

ndi tshisikwa tshi sa ofhi tshithu;

₂₆i nyadza na phukha dzoṱhe khulwane;

ndi yone khosi ya mabuka oṱhe.