JOBO 40

₂Jobo, u funa u imedzana na Ramaanḓaoṱhe wa mu khakhulula naa?

U funa u hanedzana na Mudzimu naa?

Ndi zwone, mphindule!

₄A zwo ngo mpfanela.

Ndi ḓo fhindula nda ri mini?

Zwo ntsomela.

₅Hufha ndo no ḓi amba nda pfukisa,

a thi tsha dovha.

₇Edzou takuwa u ime wo khwaṱha sa munna:

Nṋe ndi ḓo u vhudzisa mbudziso,

iwe u mphindule.

₈Kani-ha u khou ṱoḓa u sumbedza uri a wo ngo khakha, mukhakhi ndi Nṋe,

u ralo ha vha u thutha khaṱhulo yanga?

₉Maanḓa au a nga a Mudzimu naa?

Ipfi ḽau ḽi nga bvuma unga ḽawe naa?

₁₀Ndi zwone, ḓiṱame nga vhuhulu na vhurena,

u ambare vhugala na lupenyo.

₁₁Edzou vhona vhadzia-u-ḓihudza:

vha sinyutshele, u vha balanganye u vha ṱukufhadze.

₁₂Edzou sedza vhadzia-u-ḓiḓivha, u vha nyadzise,

he vha ima hone u mbo ḓi vha kuya!

₁₃Vha swiṱe vhoṱhe buseni;

tiba zwifhaṱuwo zwavho tshaloni,

₁₄ndi hone na Nṋe ndi tshi ḓo u khoḓa,

nda ri wo kunda nga maanḓa au.

₁₅Edzou vhona mvuvhu ye nda i vhumba u ḓi nga ndo vhumba iwe:

I fula hatsi unga phulu.

₁₆Edzou vhona uri muṱoḓo wayo wo khwaṱha hani!

Misipha ya thumbu yayo i na maanḓa mangafhani!

₁₇Mutshila wayo wo tou tswititi unga mukedara;

tsinga dza tshizwa tshayo dzo tou tandekana;

₁₈marambo ayo ndi phaiphi dza musinaseṱha;

mbabvu dzayo dzi nga mabaphathi a tsimbi.

₁₉I fhira miṅwe mishumo ya Mudzimu;

i nga kundwa nga Muvhumbi wayo fhedzi.

₂₀Hatsi vhune ya fula vhu mela mivhunduni,

hune ha tamba phukha dza ḓaka.

₂₁I shuvhama fhasi ha mukhalu,

ya dzumbama ṱhangani maṱafani.

₂₂I dzumbama henefho mirunzini

yo tangiwa nga miṋengeledzi.

₂₃Mulambo u tshi ḓala a i shavhi;

yo tsireledzea naho maḓi a Jorodani a tshi nga i hambela.

₂₄Ndi nnyi ane a nga phuphudza maṱo ayo,

a i fara a i phulela muhala?

₂₅U nga fasha ngweṋa nga tshilazwulo tsha khovhe naa?

U nga vhofha lulimi lwayo nga thambo naa?

₂₆U nga i longa muhala wa muṱaṱe naa?

U nga phula ṱhaha dzayo nga huka ya mupfa naa?

₂₇U vhona unga i ḓo dzula i tshi u luvhelela?

I ḓo amba na iwe nga vhulenda naa?

₂₈I ḓo pfana na iwe ya tenda

uri i ḓo vha phuli yau tshoṱhe naa?

₂₉U nga i fuwa unga tshiṋoni naa?

U nga i hunga wa takadza ngayo vhasidzana naa?

₃₀Vhavhambadzi vha ḓo i renga nga muṱaṱisano naa?

Vha nga i kovhekanya vharengisi naa?

₃₁Misevhe ya huka i nga pfula mukumba wayo naa?

Pfumo ḽa khovhe ḽi nga phula ṱhoho yayo naa?

₃₂Edzou vhea tshanḓa tshau khayo:

I ḓo vha nndwa khulu;

u nga si tsha dovha!