JOBO 39

₁U a ḓivha

uri ngululu dzi dzwala lini?

U a vhuya wa sedza phala i tshi dzwala ṋamana yayo?

₂U a vhala miṅwedzi u swika dzi tshi dzwala?

Tshifhinga tshadzo u a tshi ḓivha naa?

₃Dzi a tumba dza dzwala vhana vhadzo,

maṱungu a u dzwala a mbo ḓi vha o fhela.

₄Vhana vhadzo vha aluwa vho khwaṱha ngei ḓakani,

vha ṱuwa vha si tsha vhuya.

₅Ndi nnyi we a litsha mbiḓi ya sokou ḓitshimbilela?

Ndi nnyi we a vhofholola thambo dzo i vhofhaho?

₆Ndo i ṋea soga uri ḽi vhe hayani hayo,

nda i ṋea mavu a muṋo uri i dzule hone.

₇I sea vilinga ḽi re muḓini;

na mukosi wa musi dzo pana a i u pfi.

₈I rambalala mivhunduni uri i wane pfulo,

ya ṱoḓa mafulo madala.

₉Ṋari i ḓo tenda u u shumela naa?

I ḓo lala dangani ḽau naa?

₁₀U nga i fara nga muhala ya lima naa?

I nga u limela miṱanga naa?

₁₁Nungo dzayo dzi ḓo u ṋeani?

U nga i kumedza mishumo yau i lemelaho naa?

₁₂U nga fulufhela uri i ḓo u kaṋela mavhele naa?

Ya a kuvhanganya hune wa fhula hone naa?

₁₃Mphwe i ḓiphiṋa nga u ṱongisa phapha dzayo,

hone a i fhufhi unga gololwane.

₁₄I kudzela makumba ayo fhasi,

ya a alamela muṱavhani,

₁₅i sa londi uri i nga a pwasha nga milenzhe,

na uri phukha dza ḓaka dzi nga a kandekanya.

₁₆I itela vhana vhayo tshiṱuhu,

vha nga a si vhayo,

ya si londe uri zwe ya shuma o vha e mahandana.

₁₇Mudzimu ho ngo i ṋea vhuṱali,

ho ngo i kovhela ṱhalukanyo.

₁₈Nangwe zwo ralo, ya ṱharamudza phapha i a gidima;

i sea bere na munameli wayo.

₁₉Bere i ṋewa nungo nga iwe naa?

Mudzedze yo ambadzwa nga iwe naa?

₂₀Ndi iwe u no ita uri i fhufhe unga nzie?

I tshi ṱonga nga u fumula, zwi a ofhisa.

₂₁I ḓiphiṋa nga maanḓa ayo i tshi pala fhasi,

ya tou fhinini nga luvhilo yo livha nndwani.

₂₂I sea nyofho,

yone i sa ofhi tshithu;

a i shoni pfumo.

₂₃Mukutu u lila matungo ayo,

pfumo na banga zwe vhai.

₂₄I ḽa mavu yo nyanyuwa;

phalaphala i tshi lila a i tsha dumbelwa.

₂₅I tshi pfa lufhalafhala i a lila ya ri, “Ahaa!”

I pfa munukho wa nndwa i tshee kule,

ya pfa ndaela na mukosi wa nndwa.

₂₆Kani lurwanzhivha lu fhufha nga vhuṱali hau

lu tshi ṱharamudza phapha lwo livha tshipembe?

₂₇Goni ḽi tshi fhufhela nṱha ḽi vhudzwa nga iwe naa?

Ndi iwe u no vhudza ḽianga

uri ḽi fhaṱe tshiṱaha tshaḽo nṱha ha luwa naa?

₂₈Ḽi dzula luwani vhusiku;

ḽi dzumbama muṱumbani wa luwa;

₂₉u bva henefho ḽi ḓiṱoḓela zwiḽiwa;

maṱo aḽo a zwi vhona ḽi kule.

₃₀Mafhondo aḽo a ḓiphiṋa nga malofha;

ha vhulawa phukha, ḽi henefho.