JOBO 4

₂Jobo, arali nda amba zwi ḓo ni dina?

Hone ndi nnyi ane a nga sokou konḓelela a si ambe tshithu?

₃Inwi no laya vhathu vhanzhi,

na khwaṱhisa vho kuleaho nungo.

₄Maipfi aṋu o vha a tshi tika vha no wa,

na khwaṱhisa magona a tepaho.

₅Zwino inwi nó welwa nga khombo a ni koni u konḓelela;

yo ni tsikeledza na hanganea.

₆Hufha no vha ni tshi ofha Mudzimu ni sa solisei,

zwino ni kundwa ngani u fulufhela uri u ḓo ni lamulela?

₇Edzonou elekanya zwiṱuku:

Ho no vhuya ha lovha a si na mulandu naa?

A si na vhufhura o no vhuya a lozwiwa?

₈Nṋe ndi tshi sedza ndo vhona uri vhane vha lima vhuvhi, vha zwala khombo,

vha kaṋa zwenezwo.

₉Mudzimu u vha lozwa o sinyuwa,

vha lovha nga mbiti dzawe.

₁₀Vhavhi vha vhomba vha kuma unga dzindau,

hone Mudzimu a vha vunḓa maṋo,

₁₁vha fa unga ndau i tshi shaya tshine ya ponda,

vhana vhavho vhoṱhe vha balangana.

₁₂Ndo dzumbululelwa ipfi tshiphirini;

nḓevheni dzanga ho pfala tshihevhehevhe.

₁₃Vhukati ha vhusiku,

vhathu vho ya nga khofhe vho tou mbwandaa,

nṋe nda tshenuswa nga mabono,

₁₄nda farwa nga nyofho na u tetemela,

marambo anga oṱhe a dzinginyea.

₁₅Khofheni hanga ha fhira muya,

mavhudzi anga a takuwa nga nyofho.

₁₆Nda vhona tshiṅwe tshithu tsho ima henefho,

nda ṱalela nda si ḓivhe uri ndi mini.

Zwenezwo hu tshee he tshete, nda pfa ipfi ḽi tshi ri,

₁₇“Muthu a nga vha muvhuya maṱoni a Mudzimu naa?

U hone ane a nga vhonala o ṱamba maṱoni a Muvhumbi wawe naa?

₁₈Hufha na vhalanda vhawe vha ṱaḓulu a sa vha fulufhedzi;

na vharuṅwa u vhona vha tshi ṱahedza.

₁₉Ni vhona unga a nga fulufhedza tshivhumbwa tsha vumba,

tshithu tshi no bva buseni,

tshine tsha pwaṱuwa unga tshisusu?

₂₀Muthu a nga ḓi vuwa a tshi khou tshila nga matsheloni,

ḽi sa athu kovhela a mbo ḓi fa,

a hangwiwa a si tsha humbulwa,

₂₁nnḓu yawe ya thuthwa,

a fa a songo guda tshithu.”