JOBO 3

_2-3Yawee Mudzimu,

teketela ḓuvha ḽe nda bebwa ngaḽo!

Teketela vhusiku he ha amba ha ri,

“Ho mela mutukana muvhilini wa musadzi.”

₄Ḓuvha ḽeneḽo nga ḽi shanduke swiswi.

U songo tsha ḽi elelwa,

u songo tsha ḽi penyisela tshedza.

₅Ngavhe ḽi tshi dovha ḽa milwa

nga swiswi ha tou bodo,

ḽa tibwa nga makole,

tshedza tshaḽo tsha dzima.

₆Ngavhe vhusiku honoho vhu tshi milwa nga swiswi,

ha sudzuluswa kha maḓuvha a ṅwaha,

ha si tsha vhalwa kha maḓuvha a ṅwedzi.

₇Vhusiku honoho hu songo tsha bebwa muthu,

hu songo pfala mifhululu.

₈Vhaloi vhane vha kona u phuphudza na yone Liviathani

nga vha ḽi teketele,

₉Masase yaḽo i si tsha penya,

ngavhe vhu tshi lindela mutsho ḽi si tshe,

vhu si vhone mapfuvhi!

₁₀Ndi mini vhu songo shatela mulomo wa mbumbelo, ndi si bebwe,

maṱo anga a si vhone maṱungu mangafha?

₁₁Ngavhe ndo fela thumbuni ya mme anga,

kana ndi ri u bebwa ndi mbo ḓi fa.

₁₂Khefha mme anga vho vhuya vha ntakula marumbini avho?

Ndi mini vho vhuya vha mmamisa?

₁₃Ngavhe ndi fe zwenezwiḽa,

ndo vha ndi tshi ḓo vha ndo awela zwino,

nda lala tshaloni, nde tshete,

₁₄ndó fama na mahosi na magota

vhe vha ḓifhaṱela pfamo,

dza sala dzi matumba.

₁₅Ndo vha ndi tshi ḓo vha ndo fama,

unga vhavhusi vhe vha ḓadza pfamo dzavho nga musuku na siliva.

₁₆Ndi mini ndi songo mbo ḓi swiṱwa unga mafhelelanḓuni,

nda nga ṅwana we a si vhuye a vhona tshedza.

₁₇Tshaloni vhavhi a vha tsha luka vhunwa,

vhashumi vho netaho vha a awela,

₁₈na zwivhotshwa a zwi tsha shuma,

a zwi tsha kaidzekanywa.

₁₉Vhoṱhe vhá henengei,

vha na bvumo na vha sa ḓihwi;

phuli dzi fhedza nga u vhofhololwa.

₂₀Ndi mini Mudzimu a tshi litsha vha no tambula vha tshi ḓi tshila?

Ndi mini tshedza tshawe tshi tshi ḓi vhonetshela vha ḽaho mbilu?

₂₁Vha lindela lufu lwa si ḓe,

vha funa tshalo u fhira lupfumo;

₂₂vha tshi elekanya tshalo vha a takala;

vha tshi humbula thulwi ya mavu vha a fhululedza.

₂₃Hufha muthu a tshi tshila a sa ḓivhi hune a ya,

Mudzimu ó mu vhetshela luhura.

₂₄Tshigomelo ndi zwone zwiḽiwa zwanga,

tshinwiwa tshanga ndi miṱodzi.

₂₅Zwoṱhe zwine nda zwi ofha zwi a nngwela;

tshine nda tshi tetemela a tshi litshi u ḓa.

₂₆A thi na mulalo,

a thi rudzi mbilu,

a thi aweli, tshanga ndi nyofho.