JOBO 5

₁Jobo, huwelelani,

ni pfe arali hu na ane a fhindula.

Kani hu na muruṅwa ane na ḓitika ngae?

₂Ngoho mbilaelo dzi vhulaha a si na ṱhalukanyo;

mbiti dzi vhulaha a si na nzhele.

₃Nṋe ndo no vhona tsilu ḽi tshi ṱoka midzi,

hu si kale nnḓu yawe ya teketelwa.

₄Vhana vhawe a vha wani vhushavhelo,

vha haṱulwa khoroni vha si vhe na mulamukisi.

₅Vha shayaho zwiḽiwa vha ḓo ḽa zwe a kaṋa;

vha ḓo kaṋa na o tshotshelwaho nga mipfa;

vha re na ḓora vha ḓo emula lupfumo lwawe vha tou lu phaga.

₆Vhuvhi a vhu meli mavuni,

na khombo a i rungi i tshi bva muṱavhani na kathihi;

₇muthu ene muṋe u ḓiovhela khombo,

zwa nga ṱhase dzi tshi thamuwa dzi tshi bva muliloni.

₈Ngavhe i vhe nṋe

ndi musi ndo rembulutshela ha Mudzimu,

nda mu suma mafhungo anga.

₉A ri koni u ṱalukanya mishumo yawe mihulu;

maḓembe awe ha fheli.

₁₀Shango u ḽi nisela mvula,

a sheledza masimu.

₁₁Ee, ndi Ene a no hulisa vha no ḓiṱukufhadza,

vha lilaho a vha takadza.

₁₂U piringanya maano a vha vhukwila,

uri zwe vha luka zwi si pfumbe;

₁₃a fasha vhaṱali nga maano avho,

vhunwa havho ha kumbiwa.

₁₄Vha welwa nga swiswi maṱavhelo,

masiari tshivhangalala vha phuphudzika ha nga ndi vhusiku.

₁₅Mudzimu Ene u tinyisa vhaheḓana pfumo ḽa vhadziavhunwa,

u tsireledza vhashai vha si kandeledzwe;

₁₆u ṋea vhatshinyali fulufhelo,

vhavhi a vha vala milomo.

₁₇Wa mashudu ndi uyo ane a kaidzwa nga Mudzimu,

ni songo lamba Ramaanḓaoṱhe a tshi ni laya;

₁₈ndi Ene a no phula mbonzhe,

a dovha a dzi fhodza;

tshanḓa tshawe tshi a huvhadza, tsha dovha tsha rindidza.

₁₉Naho khombo dza anda hani,

u ḓo u lamukisa wa si huvhale;

₂₀ha wa nḓala u ḓo u tshidza wa si fe;

ha vuwa nndwa u ḓo u pilela pfumo.

₂₁Naho vha u sasaladza nga ndimi dzi no nga ṱhamu,

u ḓo u tsireledza,

ndozwo i tshi ḓa wa si ofhe tshithu.

₂₂Hú na ndozwo na nḓala, iwe u ḓo sokou sea,

wa si ofhe zwivhanda zwa ḓaka.

₂₃U tshi lima, matombo a ḓo u sendelela,

wa tshila nga mulalo na zwivhanda zwa ḓaka.

₂₄Ndi hone u tshi ḓo tshila nḓuni yau u sa ofhi tshithu,

u tshi vhala thakha yau wa wana hu si na yo xelaho.

₂₅U ḓo vha na vhana vhanzhi;

vha ḓo anda unga hatsi mafuloni.

₂₆U ḓo dzhena tshaloni wo ranga u lalama wa shulwa muṱoḓo,

wa nga goroi ine ya kaṋiwa yo vhibva.

₂₇Jobo, hezwo ro zwi ṱoḓesesa ra zwi ḓivha, ndi ngoho;

na inwi ni tshi zwi pfa ni zwi dzhiele nzhele.