JOBO 38

Ndi nnyi uyu ane a tsira nzudzanyo yanga nga maipfi a sa sumbi nḓivho?

₃Edzou takuwa u ime wo khwaṱha sa munna:

Ndi ḓo u vhudzisa mbudziso,

iwe wa fhindula.

₄Ndi tshi tea ḽifhasi,

wo vha u hone?

Arali u tshi zwi ṱalukanya, mmbudze.

₅Ndi nnyi we a ela ḽifhasi?

Hufha u tshi zwi ḓivha.

Ndi nnyi we a ḽi ela nga ludzi a tshi ḽi tea?

₆Tshi tikaho phuphu dzaḽo nga fhasi ndi mini?

Tombo ḽa muteo waḽo ḽo vhewa nga nnyi?

₇Ḓuvha ḽeneḽo ho fhululedza ṋaledzi dzoṱhe dza mutsho,

vharuṅwa vhoṱhe vha pembela.

₈We a hoṋela lwanzhe ndi nnyi,

zwiḽa lu tshi thuthuba lu tshi bva thumbuni ya shango?

₉Ndi zwiḽa ndi tshi lu tiba nga makole,

nda lu putela nga swiswi,

unga mme a tshi putela lushie.

₁₀Ndo lu vhetshela mukano

nda lu hoṋela thungo dzoṱhe,

₁₁nda lu vhudza nda ri,

“U guma henefha, a u tsha pfuka!

Hafha ndi hone hune magabelo au a maanḓa

a ḓo guma hone!”

₁₂Jobo, tshee wa bebwa,

wo no vhuya wa ri nga ḽi tshe,

ḽa tsha naa?

Wo no vhuya wa ri ḽi tshe,

₁₃ḽi kwame vhusendekamisi,

vhavhi vha ukhuthwe he vha dzumbama hone naa?

₁₄Ḽi ita uri mivhundu na magovha zwi vhonale zwavhuḓi,

unga mutalo wa makolo kha vumba,

zwa nga nguvho yo onyana.

₁₅Vhavhi vhone vha dziṅwa tshedza,

vha kulwa nungo,

vha si tsha huvhadza vhaṅwe.

₁₆Wo no vhuya wa tshimbila

wa swika zwisimani zwa lwanzhe?

Wo no vhuya wa tshimbila mativhani alwo?

₁₇Wo no vhuya wa sumbedzwa khoro dza lufu?

Wo no vhuya wa vhona tshifhingo itsho tshitswu-tshitswu?

₁₈U a vhuya wa ṱalukanya uri ḽifhasi ndi ḽingafhani?

Mmbudze arali hezwo zwoṱhe u tshi zwi ḓivha.

₁₉U a ḓivha hune tshedza tsha bva hone?

Swiswi ḽone ḽi dzulafhi?

₂₀U nga zwi sumbedza hune zwa fanela u guma hone,

kana wa dovha

wa zwi humisela hune zwa dzula?

₂₁Ndi vhona unga u a zwi ḓivha –

hufha wo vha wo no bebwa.

Wo tshila wa lalama.

₂₂Wo no vhuya wa dzhena tshisikuni tsha gabugu,

kana wa vhona ḓulu ḽa tshifhango?

₂₃Ndo zwi vhulungela musi wa khombo,

maḓuvha a govholano na nndwa.

₂₄Wo no vhuya wa ya hune ḓuvha ḽa bva hone,

kana hune muya wa vhubvaḓuvha wa vhudzula

u tshi bva hone?

₂₅Ndi nnyi we a phula milonga ya mvula ya mikumbela,

maḓumbu a mvula a a swielela nḓila?

₂₆Ndi nnyi a no nisa mvula sogani,

ya na phangani hu sa dzuli muthu?

₂₇Ndi nnyi a no sheledza shango ḽo omelelaho

ha mela hatsi vhutete?

₂₈Mvula i na khotsi naa?

Ṅwando u bebwa nga nnyi?

₂₉Tshifhango tshi bva thumbuni ya nnyi?

Ndi nnyi a bebaho mahaḓa?

₃₀A no shandukisa maḓi a tou te unga tombo,

a khaṱhisa lwanzhe, ndi nnyi?

₃₁U ḓo kona u vhofhekanya Tshilimela,

kana wa vhofholola mbofho dza Maakhala?

₃₂U nga endedza ṋaledzi dzi no kala ṅwaha,

wa tshimbidza Khohamutsho na vhana vhayo naa?

₃₃U ḓivha milayo i no vhusa lutombo naa?

U nga ita uri na fhano fhasi zwi ralo naa?

₃₄U nga ṱavhela makole mukosi

a nisa mvula ya u tiba naa?

₃₅Nḓadzi i tshi yo rwa i ruṅwa nga iwe naa?

I nga ḓa phanḓa hau ya ri, “Ri fhano!”?

₃₆Ndi nnyi a no sevha lufhoro

uri ḽi tshi tsha hu ḓo vha na mvula ya mibvumbi,

kana a ṋea mukuku ṱhalukanyo ya u imba mutsho?

₃₇A re na vhuṱali ha u vhala makole ndi nnyi?

Ndi nnyi a no shulula mvuvhelo dza ṱaḓulu, ya na,

₃₈buse ḽo omelelaho ḽa ṋukala ḽa vhumbana,

maḓinga a nambatelana?

₃₉Ndau dza tsadzi u a dzi zwimela,

wa fusha ndau i na nḓala –

₄₀ndi amba musi dzo dzumbama dzo lalela,

dzi tshi dodela maṱakani dzi tshi yo ponda?

₄₁Ndi nnyi a no posela mahunguvhu tshidu

musi vhana vhao vha tshi lilela Mudzimu,

a tshi tendeleka nga u shaya zwiḽiwa?