JOBO 37

₁Hezwo zwi karusa mbilu yanga, ya tou sinḓa,

ya fhufha ya bva vhudzuloni hayo.

₂Noṱhe thetshelesani zwavhuḓi

Mudzimu a tshi vhomba!

Ipfani a tshi amba ha tou bvuma!

₃U vhofholola lupenyo lwa buḓekanya lutombo,

lwa ri vhenge u bva vhusendekamisi u swika vhusendekamisi;

₄zwenezwo ha pfala ipfi ḽawe ḽi tshi vhomba,

a ri ngindii, ha pfala ipfi ḽawe ḽa maanḓa,

na lupenyo a sa lu humisi

hezwi ipfi ḽawe ḽi tshi bvuma.

₅Ipfi ḽa Mudzimu ḽi tshi bvuma

hu itea zwimangadzo;

u ita mishumo mihulu ine ra si i ṱalukanye.

₆U amba na gabugu a ri,

“Wela fhasi!”

a amba na mvula a ri,

“Shulutshela fhasi hu tou pwaṱa!”

₇U imisa mishumo yoṱhe ya vhathu,

uri vhathu vhoṱhe vha ḓivhe mishumo yawe.

₈Phukha dza ḓaka dzi yo dzumbama,

dza dzula vhulaloni hadzo.

₉Maḓumbu a vuwa a tshi bva tshisikuni tshao,

muya wa ḓa na murotho u lumaho,

₁₀mufemo wa Mudzimu u khaṱhisa maḓi,

a oma a tou te.

₁₁U panga makole maḓi a tou pha,

a ruma lupenyo lwa buḓekanya lutombo,

₁₂a rembulusa makole, a a sumba hune a ya,

a ita zwoṱhe zwine Mudzimu a amba

hoṱhe shangoni ḽoṱhe.

₁₃A nga ḓi nisa mvula a tshi itela u lozwa vhathu,

kana u vha sumbedza vhuthu hawe,

kana u ḓitakadza.

₁₄Vho-Jobo, nga vha thetshelese ndi vha vhudze:

nga vha dzou elekanya zwimangadzo zwi itwaho nga Mudzimu.

₁₅Vha a ḓivha uri Mudzimu u langa hani makole,

na uri u penyisa hani lupenyo lu tshi bva khao?

₁₆Vha a ḓivha uri a nembelela hani lutomboni?

Zwimangadzo hezwo zwi itwa nga Ene

a re na nḓivho yo khunyelelaho.

₁₇Zwino vhone khezwi na zwiambaro

zwi tshi vha bvisa mabiko nga biso

musi shango ḽoṱhe ḽo netiswa nga muya u bvaho phangani!

₁₈Mudzimu a tshi ṱharamudza lutombo

lwa tou oma unga tshivhoni tsha tsimbi,

vha nga mu farisa naa?

₁₉Vhone nga vha ri funze zwine ra fanela u vhudza Mudzimu.

Riṋe a ri koni u hanedzana nae, ri swiswini.

₂₀A nga vhudzwa ha pfi ndi ṱoḓa u amba?

Muthu a nga tou ri kha ndi govhedzwe?

₂₁Zwino ndi nnyi ane a nga sedza ḓuvha

ḽi tshi kombodza nga u rali ḽi lutomboni,

lwó swielwa nga muya?

₂₂U ḓa a tshi bva devhula,

e kha vhugala ha musuku;

Mudzimu u ḓa o fuka lupenyo lu ofhisaho.

₂₃Maanḓa a Ramaanḓaoṱhe ha swikelwi nga muthu;

u haṱula a sa ṱaluli,

u na vhuthu vhuhulu, ha kandeledzi muthu.

₂₄Ndi zwine vhathu vha mu ofha.

Vhoṱhe vhane vha ḓiita vhaṱali u a vhuya a vha londa naa?