JOBO 36

_1-2Vha songo fhela mbilu,

kha vha thetshelesenyana zwine nda ambela Mudzimu.

₃Nḓivho yanga a si ya zwino,

ndi ḓo vha sumbedza uri Muvhumbi wanga ha khakhi.

₄Vhukuma, zwine nda vha vhudza, a hu na tshi si tshone;

ane vha mu vhona phanḓa havho ndi munna wa vhuṱali ho khunyelelaho.

₅Naho maanḓa a Mudzimu e mahuluhulu,

ha nyadzi muthu;

u na maanḓa, ṱhalukanyo yawe ndi khulu.

₆Ha tendi vhavhi vha tshi ḓi tshila;

vhashai u ḓi vha ṋea pfanelo dzavho;

₇u dzula a tshi londola vhavhuya.

U ita uri mahosi a vhuse miṅwaha na miṅwaha,

hone vhá vhuya vha ḓihudza,

₈vha farwa vha vhoxwa nga dzigeḓane,

vha tandwa nga thambo, vha tambudzwa;

₉u vha sumbedza zwe vha ita –

uri vho tshinya nga u ḓihudza;

₁₀u ralo ha vha u ita uri vha kolongonye nḓevhe vha tshi laiwa,

a vha vhudza uri vha laṱe.

₁₁Arali vha mu thetshelesa vha mu shumela,

vha ḓo ḓi tshila nga mulalo,

zwa ḓi vha nakela.

₁₂Hone arali vha ita tshipimbi

vha ḓo ḽiwa nga pfumo,

vha fa nge vha sa fune u ḓivha Mudzimu.

₁₃Vha no nyadza Mudzimu vha dzulela u mu sinyusa;

a tshi vha vhofha a vha ṱavhi mukosi.

₁₄Vha fa vha tshee vhaṱuku,

unga phombwe dza vhanna

dzi no dzula thembeleni dza midzimu.

₁₅Vha tambulaho u vha tshidza nga ḽone dambudzo,

a ita uri maṱungu a vha bonyolose.

₁₆Na vhone Vho-Jobo o vha kunga

uri a vha ponyokise mulomoni wa i ḽaho,

a ita uri vha ḓiphiṋe vho tsireledzea

ḓafula ḽavho ḽí na muṱumba wa zwiḽiwa zwa mapfura.

₁₇Hone zwino vha khou rwiwa nga ṱhamu yo fanelaho muvhi;

vho haṱulwa hu sa itwi tshiṱalulo.

₁₈Vha vhone vha sa ḓo ri u sinyuwa vha vho ṱunga Mudzimu;

vha vhone vha sa ḓo edzisa u pfumedzana na Mudzimu nga tshanḓanguvhoni.

₁₉Vha vhona unga lupfumo lwavho

na maanḓa avho oṱhe

zwi nga vha tika vha si wele khomboni naa?

₂₀Vha songo tama vhusiku ha khaṱhulo vhu tshi swika;

ndi tshifhinga tshine tshakha dza ḓo thubwa.

₂₁Vha vhone vha sa ḓo pambutshela vhutshinyini,

vhune nda vhona vha tshi vhu takalela

u fhira dambudzo.

₂₂Vha songo hangwa uri maanḓa a Mudzimu ndi mahulu;

ndi nnyi mufunzi ane a nga Ene?

₂₃Ndi nnyi ane a nga mu sengisa?

Ndi nnyi ane a nga mu vhudza a ri, “Wo khakha”?

₂₄U ḓi rendelwa zwine a ita;

na vhone kha vha mu rende;

₂₅vhathu vhoṱhe vha a zwi vhona,

naho muthu a tshi zwi ṱalela e kule.

₂₆Vhuhulu ha Mudzimu ndi khundaṱhalukanyo;

a ri koni u vhala miṅwaha yawe.

₂₇Ndi Ene a no kupula marotha a mvula,

shango ḽa oma,

a dovha a a ṱuḓa, a vha mvula,

a ḓadza milambo.

₂₈U shulula mvula i tshi bva kha makole,

ya nela vhathu vhanzhi.

₂₉A no ḓivha kutshimbilele kwa makole ndi nnyi?

Ene a tshi ri ngindii, ngindii, e pfamoni yawe, zwi ṱalukanywa nga nnyi?

₃₀U ita uri lutomboni lwoṱhe hu ri “vhenge”,

hone vhudzivha ha lwanzhe a dzula o tiba.

₃₁U vhusa vhathu nga u ralo,

a tshi vha ṋea zwiḽiwa, vha ḽa vha laṱa.

₃₂U puta lupenyo nga tshanḓa,

a lu sumba hune lwa yo rwa;

₃₃kholomo dzi ri u pfa mubvumo

dza ḓivha uri maḓumbu a mvula a nḓilani, dza fembedza.