JOBO 31

₁Ndo langana na maṱo anga,

nda ri a thi nga vhuyi

nda ri u sedza musidzana nda mu emula.

₂Zwino Mudzimu e makoleni, u ḓo mpfufha nga mini?

Mukovhe wanga u no bva ha Ramaanḓaoṱhe ngei ṱaḓulu ndi ufhio?

₃Khombo a yo ngo fanela u wela vhavhi naa?

Phanzi a i weli vhaitazwivhi kani?

₄Mudzimu u vhona zwoṱhe zwine nṋe nda ita,

hufha maga anga oṱhe a tshi a vhala.

₅Ndi a ana ndi ri,

a thi athu vhuya nda ita vhumbulu,

a thi athu vhuya nda fhura muthu.

₆Mudzimu nga a mmbee tshikaloni tshi sa fhuri –

u ḓo wana ndi sa solisei.

₇Arali nda pambuwa nḓilani ya ngoho,

mbilu yanga ya kungwa nga maṱo anga,

arali zwanḓa zwanga zwo ḓala tshika dza zwivhi,

₈izwo mavhele anga nga a ḽiwe nga muṅwe,

zwe nda lima zwi tupulwe nga vhaṅwe.

₉Arali mbilu yanga yo kungwa nga musadzi wa muṅwe,

nda mu lindela ndo vhandalala tsini ha vothi ḽawe,

₁₀izwo musadzi wanga, nga a bikele muṅwe munna,

a mu dzhenise nḓuni.

₁₁Zwo vha zwi tshi ḓo shonisa hani!

Wo vha u tshi ḓo vha mulandu u iswaho tsengoni.

₁₂Ndi mulilo u lozwaho hoyo;

wo vha u tshi ḓo vha wo fhisa zwoṱhe zwine nda vha nazwo.

₁₃Arali ndi songo thetshelesa muṅwe wa vhashumi vhanga a tshi nngungulela,

₁₄ndo vha ndi tshi ḓo livhana hani na Mudzimu?

A tshi ḓa u ntsengisa ndo vha ndi tshi ḓo ri mini?

₁₅Onoyo Mudzimu o mmbumbaho muvhilini wa mme anga

a si Ene o sikaho na vhashumi vhanga naa?

₁₆Ndo no vhuya nda lamba u farisa vhadziili naa?

Ndo no vhuya nda thatha tshilikadzi

dza ṱuwa na nḓala naa?

₁₇Ndo no vhuya nda litsha tsiwana dza ṱwa na nḓala nṋe ndó ḽa naa?

₁₈Hufha u bva hanani hanga ndo ḓi dzi lela unga khotsi.

U bva tshee nda bebwa ndo ḓi endedza dzitshilikadzi.

₁₉Ndo vha ndi tshi ri u wana mushai a sa koni u ḓishavhedza,

kana nda wana mutshinyali, a tshi tambula nga tsiku,

₂₀nda mu fha zwiambaro zwo lukwaho nga vhukuse ha nngu dzanga,

a konou ntenda nga u pfa vhududo.

₂₁Arali ndo vhuya nda khakhela tsiwana

nga u vhona vhahaṱuli vha tshi nnyofha,

₂₂zwenezwo ngavhe zwanḓa zwanga zwi tshi vunḓwa,

ngavhe zwi tshi paḓulwa kha mahaḓa anga.

₂₃Zwo raloho ndo vha ndi sa nga zwi iti,

hufha ndi tshi ofha ṱhamu ya Mudzimu na vhuhulu hawe.

₂₄Arali ndo vhuya nda fulufhela musuku,

kana nda u vhudza nda ri,

“Ndi iwe vhushavhelo hanga”;

₂₅arali ndo vhuya nda takalela lupfumo lwanga luhulu

lwe nda lu wana nga ṋala dzanga;

₂₆arali ndo vhuya nda ri u vhona vhugala ha ḓuvha,

kana u naka ha ṅwedzi u tshi tshimbila,

₂₇nda tenda zwi tshi kunga mbilu yanga,

nda zwi hulisa nga u khisa tshanḓa tshanga tshiphirini –

₂₈vhuvhi ho raloho ndo vha ndi tshi ḓo vhu lifha nga u wana ṱhamu;

ho vha hu tshi ḓo vha u landula Mudzimu a re ṱaḓulu.

₂₉A thi athu vhuya nda takala swina ḽanga ḽi tshi tambula,

kana nda fhululedza o welwa nga khombo;

₃₀a thi athu vhuya nda tshinya

nga u teketela swina ḽanga uri ḽi fe.

₃₁Vhashumi vhanga vhoṱhe ndi ṱhanzi:

Ndi nnyi we a vhuya a ḽa ṋama ha Jobo a si fure?

₃₂Vhatshimbili ndo vha ndi tshi vha vhidza

vha dzhena nḓuni yanga,

nda si vhuye nda litsha vha tshi lala nnḓa.

₃₃A thi athu vhuya nda tshinya,

nda tiba vhutshinyi hanga,

nda dzumba mulandu wanga mbiluni sa vhaṅwe

₃₄nga u ofha uri vhathu vha ḓo ri mini;

a thi athu vhuya nda fhumula kana nda dzumbama nḓuni

nga u ofha uri vha ḓo nnyadza.

₃₈Arali tsimu yanga ya nṱavhela mukosi

i tshi mpomoka, ya ri ndo i tswa,

maḓinga ayo oṱhe a ṋukala nga miṱodzi,

a ri ndo i dzhiela muṋe wayo;

₃₉arali ndo ḽa zwiḽiwa zwe nda zwi kaṋa,

nda si lifhe tshithu,

vhe nda i wana khavho nda litsha vha tshi fa nga nḓala,

_40aizwo-ha i songo mela mavhele, nga i mele mipfa;

i songo mela mufhoho, nga i mele tsheṋe.

₃₅A hu na a no thetshelesa zwine nda amba naa?

Ndi a ana, tshiga ngetshi:

Ramaanḓaoṱhe nga a fhindule!

Ngavhe mupomoki wanga a tshi tou ṅwala milandu yanga,

nda i vhona!

₃₆Ndo vha ndi tshi ḓo i atha kha mahaḓa,

nda i ambara unga tshiala.

₃₇Ndo vha

ndi tshi ḓo vhudza Mudzimu zwoṱhe zwe nda ita,

nda livhana nae ndi si na luvalo.