JOBO 30

₁Hone zwino vhanna

vhane nda vha fhira

vha vho tamba nga nṋe!

Vhokhotsi avho vho vha vha si tshithu,

lwe nda vha ndi sa nga vha tendeli

u dzula na mmbwa dze dza vha dzi tshi lisa nngu dzanga.

₂Nahone vho vha vha tshi ḓo kona u ntshumelani?

Hufha vho vha vho fhela nungo.

₃Vho vha vhe vhashai vha tshi fa nga nḓala,

vha tshi ṱafuna midzi yo omaho vhusiku,

ngei sogani hu sa dzuli muthu,

₄vha ṱunya maṱari a dungaho vha tshi ḽa,

vhuswa havho vhu midzi ya muṱhobi.

₅Vho thathwa nga vha havho

vha tshi vha ṱavhela mukosi unga mafobvu,

₆vha kombetshedzwa u yo dzula miedzini,

na milindini, na mapakoni,

₇henengei ḓakani vha dziḓa unga donngi,

vha dzumba ṱhoho zwiṱakani.

₈Ndi vhathu vha songo bebeaho, vha si na madzina;

vho thathwa shangoni.

₉Zwino vhana vhavho vha vho nngoḓa nga zwiimbo;

ndi tou vha tshianeo.

₁₀Vha a nnyala, a vha funi u sendela tsini hanga,

vha ita na u mpfa mare.

₁₁Vha vho ita nga u funa

nga u vhona Mudzimu o nṱangula a nṱungufhadza;

₁₂zwikhokhonono hezwi zwi vho ḓiṋea maanḓa;

zwi a mpiringedza, zwi a nngovhela;

₁₃vho nthivhela,

vha ṱoḓa u nndozwa,

a hu na ane a vha dzivhisa.

₁₄Vho zhakekanya luhura lwanga, vha dzhena;

khombo yo nngwela,

vha dzhena vha tshi tou kunguluwa;

₁₅ndo tsikeledzwa nga zwi ofhisaho;

vhugala hanga ho fhufha na muya;

mashudu anga o balangana unga gole.

₁₆Zwino ndi ḓo ṱuwa ndi tshi fa;

ndo zhongondedzwa nga misi ya maṱungu;

₁₇vhusiku marambo anga a lala a tshi rema;

vhuṱungu vhu nnduma vhu sa imi;

₁₈Mudzimu o mpfara nga mikulo nga maanḓa awe mahulu,

a somba zwiambaro zwanga zwa onyana;

₁₉u mposa fhasi matopeni;

ndi vho tou nga buse na milora.

₂₀Mudzimu, ndi tshi u vhidzelela a u aravhi;

ndi tshi rabela u sokou ṱanzwa maṱo

wa lavhelesa;

₂₁u vho nnyitela tshiṱuhu;

wa ntovhola nga nungo dzau dzoṱhe;

₂₂u a mphephera, muya wa mmbudzulela kule;

u nkhwala nga maḓumbu, wa mphufhisela nṱha na fhasi.

₂₃Ndi a ḓivha uri u khou nnyisa lufuni,

henefho hune ha kuvhangana vhathu vhoṱhe.

₂₄Ndó no vha shubi,

ndi kha ḓi ḓo vuswa nga nnyi?

Mudzimu ha mmvusi ndi sa athu wa tshoṱhe naa?

₂₅Vha lilaho a tho ngo lila navho naa?

Kani vha shayaho, a tho ngo vha pfela vhuṱungu?

₂₆Ndo vha ndo lavhelela dakalo,

ha ḓa khombo,

nda lindela tshedza,

ha ḓa zwiswi ḽa tou bodo.

₂₇Ndi lala ndi tshi ḽa mbilu;

ndi sokou dzula ndi maṱunguni;

₂₈ndo swifhadzwa ndí songo swa nga ḓuvha.

Ndi ima vhukati haṋu nda ṱavha mukosi.

₂₉Ndo no tou vha shaka ḽa phunguhwe;

khonani dzanga ndi mphwe.

₃₀Lukanda lwanga lwo no swifhala; muvhili u khou swa nga dali.

₃₁Mbila dzanga dzi vho imba dza maṱungu fhedzi;

tshiṱiringo tshi vho lidza dza zwililo.