JOBO 29

₂Ndo ṱuvha hani iḽa miṅwedzi yo fhiraho,

na aḽa maḓuvha e Mudzimu a vha a tshi nndondola,

₃zwiḽa a tshi nnakisela zwoṱhe,

tshedza tshawe tshi tshi mmbonetshela swiswini!

₄Ndi misi iḽa zwi tshi kha ḓi nnyanḓa,

vhukonani ha Mudzimu vhu tshi tsireledza muṱa wanga;

₅ndi misi Ramaanḓaoṱhe a tshi kha ḓi vha na nṋe,

ndó tangwa nga vhana vhanga.

₆Muṱa wanga wo vha u tshi shulwa nga ṱhowa,

matomboni hu tshi gubunyea milambwana ya mapfura.

₇Ho vha hu tshi ri ho kuvhangana vhahulwane khoroni ya muḓi,

na nṋe ndó thukha vhukati havho,

₈vhaṱhanngana vha tshi ri u mmbona vha sendela kule,

vhakalaha vha nkhulisa nga u takuwa

vha ima nga milenzhe,

₉magota vha fhumula vha si tsha amba,

₁₀vhaḓivhalea zwa vha somela,

vhe tshete.

₁₁Vhoṱhe vhe vha pfa bvumo ḽanga vho vha vha tshi nkhoḓa;

vhe vha mmbona vha khoḓa mishumo yanga.

₁₂Vhashai vha tshi lila, ndo vha ndi tshi vha lamukisa,

ndi tshi farisa na tsiwana, dzi si na mutikedzi.

₁₃Vhe vha vha vho ingamela tshalo, vho vha vha tshi nkhoḓa

nge nda vha tshidza,

nda ita uri mbilu ya tshilikadzi i fhululedze.

₁₄Ndo vha ndi tshi ambara vhuthu unga nguvho,

lupila lwanga na nguwane yanga hu u tonda vhathu;

₁₅ndo vha ndi maṱo a bofu,

ndi milenzhe ya zwihole;

₁₆kha vhashai ndo vha ndi tshi nga khotsi,

vhatsinda ndi tshi vha sengela;

₁₇ndo vha ndi tshi fhedza maanḓa a vhadziatshiṱuhu;

vhe vha vha vha tshi ṱoḓou pondiwa

nda vha ponyokisa.

₁₈Ndo vha ndi tshi ri ndi ḓo lalama,

maḓuvha anga a anda unga muṱavha wa lwanzhe,

nda fa ndo tangiwa nga vhana vhanga,

₁₉ndi tshi nga muri une midzi yawo ya dzula yo khuba maḓi,

matavhi awo a dzula o ṋukala nga ṅwando,

₂₀vhoṱhe vha tshi dzula vha tshi nkhulisa,

nungo dzanga dzi sa fheli,

dzi tshi nga vhura vhu no ḓi posa misevhe.

₂₁Musi ndi tshi eletshedza vhathu ho vha hu tshi fhumulwa,

ha thetsheleswa zwine nda amba,

₂₂nda ri u fhedza u amba vha si tsha fhindula,

maipfi anga a nwelela mbiluni dzavho,

a nga marotha a mvula,

₂₃muṅwe na muṅwe a a lindela unga vhalimi vha tshi lavhelela mvula ya tseula;

₂₄ndo vha ndi tshi ri u sea,

vho hanganeaho vha dovha u wana nungo;

naho vhoṱhe vho kulea nungo; nṋe nda ḓi sala ndo khwaṱha.

₂₅Ndo vha ndi tshi vha ranga phanḓa,

nda vha khethela nḓila,

nda vha endedza unga khosi, yo ranga mmbi dzayo phanḓa,

vha tshi lila nda vha fhumudza.