JOBO 28

₁Siliva i bwiwa mugodini;

na musuku u na hune wa ṱanzwiwa;

₂vhathu vha bwa ngweḓi mavuni;

vha ṋokisa musina u tshi bva kha matombo.

₃Vhathu vha tshi bwa matombo vha sunguvhela malani a shango,

na swiswi a vha ḽi ofhi,

vha tshimbila swiswini ho tou bodo.

₄Vha bwa milonga ya migodi,

fhasi-fhasi, kule na hune ha dzula vhathu,

hune muthu a sa ḓivhe uri ho vhuya ha kandwa;

henengei kule na vhathu vha nembelela nga thambo.

₅Zwiḽiwa zwi mela mavuni, hone ngomu mavuni eneo

ho fukukanywa,

zwa nga ho fhiswa nga mulilo.

₆Matomboni hu bva safire,

buseni ḽaho hu bva thombwana dza musuku.

₇A hu na lurwanzhivha lu no vhona nḓila heyo yo dzumbamaho;

na ḽiṱo ḽa goni ḽi nga si i vhone.

₈Tshivhanda a tshi vhuyi tsha hu kanda;

na ndau a i vhuyi ya ṋengeledza henefho.

₉Vhathu vha kora matombo a konḓesaho,

vha fukula dzithavha mudzini wadzo,

₁₀vha phuletshedza lutombo,

vha tumbula matombo a mutengo muhulu.

₁₁Vha thivha zwisima zwa milambo ngomu mavuni,

zwo dzumbamaho vha zwi bvisela tshedzani.

₁₂Vhuṱali hone vhu nga wanala ngafhi?

Ri nga guda ngafhi u ṱalukanya?

₁₃A hu na muthu a no ṱalukanya mutengo waho;

a vhu wanali kha vhathu vha ṋama.

₁₄Dzivha ḽi ri, “A vhuho fhano!”

Lwanzhe lu ri, “Nṋe thi naho!”

₁₅Na musuku a u koni u vhu renga; mutengo waho a u vhambedzwi na siliva;

₁₆musuku u songo vangwaho u nga si vhu renge;

onikisi na safire a zwi vhambedzwi naho;

₁₇vhu fhira mutengo wa musuku, na mudzio wa musuku

kana ngilasi i vhonadzaho;

₁₈khorala na khristala a zwi vhuyi zwa vhambedzwa naho;

mutengo waho u fhira pherele;

₁₉gurannḓa yo nanguludzwaho a i vhambedzwi naho;

na musukusuku a u vhu rengi.

₂₀Zwino-ha tshisima tsha vhuṱali tshi ngafhi?

Ndi ngafhi hune ra nga guda u ṱalukanya?

₂₁A vhu vhonwi nga tshivhumbwa tshi tshilaho na tshithihi,

nangwe tshi tshiṋoni tshi fhufhaho.

₂₂Lufu na dindi zwi ri,

“Ro tou pfa zevhezevhe ḽaho fhedzi.”

₂₃Ndi Mudzimu e eṱhe a no ḓivha nḓila yo livhaho khaho;

ndi Ene a no ḓivha hune vhuṱali ha wanala;

₂₄Ene u vhona he ḽifhasi ḽa guma;

u vhona na zwoṱhe zwi re fhasi ha lutombo.

₂₅Zwiḽa a tshi kalela muya maanḓa awo,

a vhetshela lwanzhe mukano;

₂₆zwiḽa a tshi nanga hune mvula ya ḓo na,

makole a no bvuma a a sumba nḓila,

₂₇ndi musi we a vhona vhuṱali a vhu anganya,

a vhona mutengo waho a vhu khwaṱhisa,

₂₈a konou vhudza muthu a ri,

“U ofha Muṋe wa zwoṱhe ndi hone vhuṱali;

u furalela vhuvhi ndi yone ṱhalukanyo.”