JOBO 27

_1-2Ndi ana nga Mudzimu Ramaanḓaoṱhe a tshilaho,

Ene ane a nndaṱa ndi si na mulandu, a ntambudza,

₃ndi ri: arali Mudzimu a tshee o mpha mufemo,

mufemo wawe u tshi kha ḓi vha ningoni dzanga,

₄milomo yanga i nga si vhuye ya bula mavhi,

lulimi lwanga lu nga si vhuye lwa amba a vhufhura!

₅Ngoho ndi nga si vhuye nda ri inwi ni ngohoni,

ndi ḓo ḓi ri a thi na mulandu ndi vhuye ndi fe;

₆ndi ḓo ḓi omelela kha ḽa uri ndi ngohoni;

luvalo lwanga lwo ṱamba.

₇Ngavhe maswina anga oṱhe ane a nkhanedza

a tshi itwa zwine zwa itwa vhavhi,

a rwiwa unga vhatshinyi.

₈Vha nyadzaho Mudzimu vha ḓo fulufhela zwifhio

musi vha tshi tumulwa,

musi Mudzimu a tshi vha dzhiela vhutshilo havho?

₉Musi wa khombo

Mudzimu u ḓo thetshelesa mukosi wavho naa?

₁₀Ramaanḓaoṱhe o vha o fanela u dzula e dakalo ḽavho,

vha ḓi dzula vha tshi mu rabela misi yoṱhe.

₁₁Litshani ndi ni funze

uri maanḓa a Mudzimu ndi mangafhani;

ndi nga si ni dzumbele zwe Ramaanḓaoṱhe a dzudzanya.

₁₂Hufha zwoṱhe no tou zwi vhona inwi vhaṋe,

zwino ndi mini ni tshi amba zwi sa pfali?

₁₃Zwine Mudzimu a livhanya vhavhi nazwo ngezwi;

ndi ḽone ifa ḽine mavemu a ṋewa nga Ramaanḓaoṱhe:

₁₄vha nga ḓi vha na vhana vhanzhi vha vhatuka –

vhoṱhe vha ḽiwa nga pfumo,

vhaḓuhulu vhavho vha si ḽe vha fura;

₁₅vha salaho vha ḓo fa nga dwadze vha si swiṱwe,

na tshilikadzi dzavho dza si vha lile.

₁₆Muvhi a nga ḓi khokha siliva ya nga buse,

zwiambaro zwa nga thulwi dza vumba,

₁₇hone zwa sala zwi tshi ambarwa

nga vha thetshelesaho Mudzimu,

vha si na mulandu vha kovhekana iyo siliva.

₁₈Nnḓu i no fhaṱwa nga muvhi i ḓo nga tshiṱaha tsha lubuvhi,

kana ḓingo ḽa u linda masimu.

₁₉A tshi yo lala u vha o pfuma,

a tshi vuwa a wana lupfumo lwo fhufha,

a si tsha dovha a lu wana.

₂₀Zwi ofhisaho zwi ḓo mu kumba unga muḓalo wa maḓi;

u ḓo hwalwa nga maḓumbu vhusiku;

₂₁muya u fhisaho u ḓo mu hwala wa ṱuwa nae,

wa mu swiela nḓuni yawe;

₂₂u ḓo mu vhudzula u sa mu khathutsheli,

ene a shavha nga luvhilo luhulu,

₂₃ḓumbu ḽa fhululedza a tshi shavha,

ḽa tita ḽa mu thatha nḓuni yawe.