JOBO 24

₁Ndi mini Ramaanḓaoṱhe a sa vhei tshifhinga tsha u haṱula?

Ndi mini vhane vha mu ḓivha vha sa vhoni maḓuvha eneo?

₂Vhathu vha sudzulusa matombo a mikano vha ḓiengedzela masimu,

vha fuwa sambi ḽa nngu dze vha tswa,

₃vha kumba donngi ya tsiwana,

vha fara phulu ya tshilikadzi a vhuya a lifha mulandu;

₄vha thatha vhaheḓana nḓilani,

vha kombetshedza vhasingili u yo dzumbama.

₅Vha ita uri vhashai vha yo ṱoḓa zwiḽiwa sogani unga mbiḓi,

vha ri vhana vhavho vha yo doba zwidu phangani;

₆vhaheḓana vha kaṋa zwiḽiwa zwa zwifuwo masimuni, vha ḽa,

vha ṱala ṱhalane ya nḓirivhe masimuni a vhavhi;

₇vhusiku vha lala vha songo fuka tshithu,

a vha na tsha u pila phepho,

₈vha ṋukadzwa nga vhusuṱo vhu naho dzithavhani,

vha nambatela matombo nga u shaya vhudzumbamo.

₉Tshetshe dzi si na vhokhotsi dzi zhuvhulwa dzi tshi mama dza itwa dziphuli,

vhana vha vhashai vha a dzhiwa

ha lifhiwa mulandu ngavho;

₁₀vhashai vha tshimbila fhedzi nga tsiku;

vha kaṋela vhapfumi mavhele,

ngeno vhone vha tshi dzivhiswa u a ḽa;

₁₁vha hamula nyolivi vha ita mapfura,

vha fhonḓela nḓirivhe bonḓeloni vha ṱuḓa waini,

vhone vhaṋe vha tshi khou fa nga ḓora.

₁₂Ngei miḓini

vha faho vha a gomela,

khuvhabvu dzi ṱavha mukosi,

hone Mudzimu ha vhuyi a vhea vhavhi mulandu.

₁₃Hu na vhane vha vhenga tshedza;

a vha tshi ṱalukanyi,

na hune tsha vhonetshela a vha yi.

₁₄Phondi i vuwa hu tshee vhusiku,

ya yo vhulaha mushai na musingili,

vhusiku u vha fobvu.

₁₅Phombwe yone i lindela lufhimavhaeni;

i a khurumela uri i si vhonwe nga muthu.

₁₆Mafobvu a pwasha dzinnḓu vhusiku;

masiari vha a dzumbama,

a vha pfani na tshedza;

₁₇ḽi tshi tsha vhoṱhe vha vhona hu hone ḽo sikuwa, ho tou bodo;

zwi ofhisaho zwa vhusiku,

vhone a vha zwi ofhi.

₁₈Kha vha nge makukwi a hwalwaho nga muḓalo wa maḓi,

Mudzimu a teketele thundu dzavho,

masimuni avho a minḓirivhe hu si tsha shuma muthu!

₁₉Vhavhi nga vha milwe nga tshalo,

vha nge mahaḓa a tshi ṋoka nga biso,

vha nge maḓi a tshi nwelela mavuni o omaho,

₂₀na vhomme avho vha si tsha vha elelwa,

mbungu dzi ḓiphiṋe nga u vha ḽa!

Nga vha hangwiwe,

vha paḓukane unga muri,

u vhe wone mulifho wa vhuvhi havho!

₂₁Vha ḽeledza muumba a si na vhana,

tshilikadzi vha si i itele vhuthu.

₂₂Mudzimu u khwikhwidza vha maanḓa nga maanḓa awe;

a takuwa, vha dzula vhe na nyofho ya lufu.

₂₃Mudzimu a nga ḓi vha litsha,

vha pfa vho tsireledzea,

hone a ḓi dzula o vha vhea iṱo.

₂₄Nga zwi vha nakele tshifhinganyana,

vha mbo ḓi ṱuwa,

vha pute unga lukumbe lwa muṋawa lwo ṱhukhulwa,

vha nge khula ya makhaha yo tshewa!

₂₅Zwo ralo!

Ndi nnyi ane a nga nkhanedza a ri a si ngoho?