JOBO 23

_1-2Ndi kha ḓi gungula nga u pfa mbilu u vhavha;

tshanḓa tsha Mudzimu tsho ntsikeledza

nangwe ndi tshi khou gomela.

₃Ngavhe ndi tshi ḓivha hune nda nga mu wana hone,

nda tou swika hune a dzula!

₄Ndo vha ndi tshi ḓo hwedza mulandu wanga,

nda ḓisengela ndo tanda na tsinga;

₅ndo vha ndi tshi ḓo ḓivha phindulo yawe,

nda ṱalukanya zwine a amba.

₆O vha a tshi ḓo nkhanedza nga maanḓa awe mahulu?

Aiwa, o vha a sa nga mpomoki;

₇ndo vha ndi tshi ḓo hanedzana nae,

a thi na mulandu;

muhaṱuli wanga o vha a tshi ḓo mmbofholola,

nda si tsha vhuya nda pomokwa.

₈Ndo ṱoḓa Mudzimu vhubvaḓuvha nda si mu wane,

nda ṱoḓa vhukovhela,

na hone nda si mu wane;

₉a tshi shuma devhula,

a thi mu vhoni;

a tshi ya tshipembe, na hone a thi mu vhoni.

₁₀Hone Ene u a ḓivha hoṱhe hune nda tshimbila;

á nṱola u ḓo vhona ndo kuna unga musuku.

₁₁Milenzhe yanga yo kanda vhuṱalani hawe;

ndo tshimbila nḓilani yawe ndi sa pambuwi.

₁₂Ndi ḓi dzula ndi tshi ita zwine a ri zwi itwe;

zwine a amba ndi zwi vhulunga mbiluni yanga.

₁₃Hone Ene a amba o amba;

ndi nnyi ane a nga mu dzivhisa?

U ita zwine a funa.

₁₄U ḓo khunyeledza zwe a nnzudzanyela zwone,

naho hu na zwiṅwe zwinzhi zwe a mmbetshela.

₁₅Ndi zwine nda tetemela nga nyofho maṱoni awe;

ndi tshi elekanya zwoṱhe hezwi ndi a mu ofha.

₁₆Mudzimu o nkula nungo;

Ramaanḓaoṱhe o nnyofhisa.

₁₇Naho zwo ralo, swiswi ḽino ḽo ntibaho khofheni

ḽi nga si nthivhe mulomo.