JOBO 22

₂Muthu a nga itela Mudzimu mini?

Na vhuṱali hawe,

zwi farisa ene muṋe fhedzi.

₃Arali ni muvhuya,

Ramaanḓaoṱhe zwi mu takadza ngani?

Arali ni sa solisei, ú wanani?

₄Hezwi Mudzimu a tshi ni kaidza a ni isa tsengoni,

u zwi ita nga u vhona ni tshi mu hulisa naa?

₅A si uri no tshinyesa naa?

Ndi nga mulandu wa vhuvhi haṋu vhu sa fheli!

₆Ni sokou fara thundu ya wa haṋu ni tshi ri a nga si lifhe mulandu,

na vhuya na tou ṱangula vhathu vha sala fhedzi.

₇We a vha e na ḓora no mu dzima maḓi,

a na nḓala na si mu fhe zwiḽiwa.

₈No dzhia shango nge na vha na maanḓa,

vhaswikeli vhaṋu vha dzula khaḽo.

₉No thatha tshilikadzi dza ṱuwa fhedzi,

na khokhovhedza tsiwana.

₁₀Ndi zwe na tangwa nga zwikwekwe,

na mbo ḓi tshenuswa nga zwi ofhisaho,

₁₁swiswi ḽa tou bodo na si tsha vhona,

na tibwa nga muḓalo wa maḓi.

₁₂Mudzimu ha dzuli ṱaḓulu-ṱaḓulu kani?

Edzonu sedza ṋaledzi uri dzi kule hani!

₁₃Naho zwo ralo, inwi ni ri, “Mudzimu u ḓivhani?

A nga haṱula hani ó tsirwa nga makole?”

₁₄Ni vhona unga makole a mu kundisa u vhona,

hezwi a tshi tandula mikano ya lutombo.

₁₅Ni ḓo ḓi tshimbila nḓilani ya kale yo tshimbilwaho nga vhavhi?

₁₆Ḓivhani uri vho kumbwa nga muḓalo wa maḓi

tshifhinga tshavho tshi sa athu swika.

₁₇Ndi vhathu vhane vha amba na Mudzimu,

vha ri, “Ri litshe!

Ramaanḓaoṱhe a nga ri itani?” –

₁₈hone e Ene o ḓadzaho nnḓu dzavho

nga zwithu zwavhuḓi.

Mihumbulo ya vhavhi nṋe a thi pfani nayo.

₁₉Vhavhuya vha tshi vhona muvhi a tshi ṱungufhadzwa,

vha a takala,

vha si na mulandu vha a sea, vha ri,

₂₀“Koṱo, maswina ashu o lozwiwa!

Lupfumo lwavho lwo fhiswa nga mulilo lwe lore!”

₂₁Pfumedzanani na Mudzimu,

ndi hone zwi tshi ḓo ni nakela;

₂₂ṱanganedzani pfunzo yawe,

ni vhulunge ipfi ḽawe mbiluni yaṋu;

₂₃humelani ha Ramaanḓaoṱhe,

ndi hone a tshi ḓo ni tika;

ni laṱe vhuvhi vhu no itwa nḓuni yaṋu,

₂₄na musuku waṋu ni laṱe kule,

lupfumo lwaṋu ni lu kudze muṱavhani wa mulambo!

₂₅Ramaanḓaoṱhe nga a vhe Ene musuku waṋu,

a vhe Ene siliva yaṋu yo khokhwaho,

₂₆ndi hone Ramaanḓaoṱhe a tshi ḓo vha Ene dakalo ḽaṋu,

na konana na Mudzimu.

₂₇Ni tshi rabela u ḓo ni aravha,

na ḓo konou khunyeledza zwe na mu anela.

₂₈Zwoṱhe zwine na ita zwi ḓo ni nakela;

nḓila dzaṋu dzi ḓo vhonetshelwa nga tshedza.

₂₉Arali muthu a ri u wiswa, inwi na ri, “Nga a vusiwe!” –

ndi hone Mudzimu a tshi ḓo tshidza

vha u ḓiṱukufhadza;

₃₀u ḓo vhofholola na a re na mulandu,

a tshi itela vhuvhuya haṋu.