JOBO 21

_1-2Thetshelesani zwine nda amba,

zwi vhe zwone zwine na nkhuthadza ngazwo.

₃Nkonḓeleleni ndi ambe, ndi hone ni tshi ḓo kona

u nkolela.

₄Ndi khou gungulela vhathu vhapenyu naa?

Ndi ḓo litshelani u fhela mbilu?

₅Ni tshi ntsedza a ni akhamali?

A zwi ni someli?

₆Ndi tshi elekanya zwo nngwelaho ndi pfa ndi tshi ofha,

muvhili wanga wa tetemela.

₇Ndi mini Mudzimu a tshi tendela vhavhi

vha tshi tshila?

Ndi mini vha tshi lalama maanḓa avho a ḓi engedzedzea?

₈Vha na vhana na vhaḓuhulu, vho ṱoka midzi,

vha aluwa vha tshi khou ḓi vha vhona.

₉Miṱani yavho hu na mulalo,

a vha ofhi tshithu;

ṱhamu ya Mudzimu a i vha weli.

₁₀Mboho dzavho dzi a hwela,

tsadzi dza si kundwe u vha na maḓamu;

na u fholodza a dzi fholodzi.

₁₁Vha sokou litsha zwiṱoma zwavho,

zwa bva unga sambi ḽa ngwana;

vhana vhavho vha tshina, vha thamukana.

₁₂Vha imba hu tshi khou lila tshwayo na mbila;

vha pembela hu tshi khou lila tshiṱiringo.

₁₃Vha tshila vha guma vho takala,

vha dzhena tshaloni nga mulalo.

₁₄Vha vhudza Mudzimu vha ri, “Ri litshe!

A ri ṱoḓi u ḓivha nḓila dzau!

₁₅Ramaanḓaoṱhe ndi nnyi ane ra pfi ri mu luvhe?

Ri tshi mu rabela ri wanani?”

₁₆Vha zuwa uri lupfumo lwavho

vho lu wana nga vhukoni havho.

Nṋe ndi landula muya wo raloho,

₁₇hone mmbudzeni-ha uri luvhone lwa muvhi lwo no vhuya lwa dziṅwa naa;

o no vhuya a welwa nga khombo kani?

Mudzimu ó sinyuwa u a vhuya a mu livhanya

na mafhanza?

₁₈U a vhuya a mu vhudzula unga mathukhwi a hwalwaho nga muya,

a nga mungu u hwalwaho nga maḓumbu?

₁₉Ni ri muthu u ri u tshinya, Mudzimu a rwa vhana vhawe!

Aiwa, nga a rwe ene muṋe a zwi ḓivhe!

₂₀Muvhi nga a wane ṱhamu ye a livhanywa nayo!

Nga a nwe mbiti dza Ramaanḓaoṱhe.

₂₁Arali muthu o fa,

miṅwedzi yawe yo tumuwa,

u kha ḓi londa zwa muṱa wawe naa?

₂₂Muthu a nga funza Mudzimu vhuṱali naa?

Hufha Ene a tshi haṱula vha re vhuimoni vhuhulwane.

₂₃Muṅwe u a lalama, a vha na nungo a vhuya a fa,

a fa o takala o rudza mbilu,

₂₄zwirumbi zwawe zwó angula,

marambo awe ó fura mwongo.

₂₅Muṅwe ha vhuyi a takala;

u tshila a fa mbilu i tshi vhavha;

₂₆vhoṱhe vhuvhili havho vha fhedza

nga u vhandekana buseni,

mbungu dza tou phapha nṱha havho.

₂₇Nṋe ndi ḓivha mihumbulo yaṋu, na maano ane na ṱoḓa u mmbaisa ngao

ndi a a ḓivha.

₂₈Ni ri, “Nnḓu ya munna muhulu i ngafhi zwino?

I ngafhi pfamo ye muvhi a vha o dzula khayo?”

₂₉No vha ni sa vhudzisi vhafhiri vha gondo naa?

Zwe vha ni vhudza a no ngo zwi pfa kani,

₃₀hu tshi pfi muvhi u a sala musi wa khombo,

musi wa mbiti dza Mudzimu u a ponyokiswa?

₃₁Ane a nga hanedzana na muvhi khoroni ndi nnyi?

Ndi nnyi ane a nga mu lifhedza zwe a ita?

₃₂U yo swiṱwa nga mutsindo,

tshalo tshawe tsha lindwa,

₃₃vhathu vhanzhi vha rwa muduba vha mu fhelekedza;

na mavu a tou mu tsika zwavhuḓi.

₃₄Huno inwi ndi mini ni tshi nkhuthadza

nga maipfi a sa ambi tshithu?

Phindulo dzaṋu ndi muhoyo fhedzi!